هبه حبيبة قلبي…..بقلم خالد أحمد الشهير بـ خالد العطار

هبه حبيبة قلبي
……………
هبه يا حبيبة قلبي يا عمري
شفتي العمر بـ يجري أزاي
أهو جاء اليوم وبقيت أنا وحدي
اتجوزتي وأخذك عبدالرحمن مني
وأنا راح أعاني لوحدي يا قلبي
من الوحدة واليوم الجاي
كنتِ معايا وشايله همي
في اللي رايح واللي جاي
جوزنا أخواتك وأنتِ معايا تعبتي ياقلبي
مشينا أنا وأنتِ مشوار و طريق صعب طويل
أستحملتِ سنين كثيرة من عمركِ
تعب وشقى وشغل معايا كتير
من غير شكوى ولا قلتِ في يوم أنكِ تعبانا
وأستحملتي أن خطوبتكِ حتى تطول
عدى عليها سنه وأثنين وثلاثه والرابعه
كان نهايتها بعادك عني ياقلبي
و جاء يوم وكان يوم زفافكِ
صعب ياقلبي فراقك عني
أنا مش عارف أحسبها أزاي
كل ما أرجع بسنين العمر معاكِ
وأفتكرك كنتِ معايا أزاي نونو صغيورة
فوق كتفي بتلعب وحده وحده بقيتي بتمشي
وادام عيني بقيتي شابه كبرتي يا نونه
ومرت سنين العمر ادام عيني ولقيتها بتجري
كان نفسي سنينكِ يا قلبي ما تمشيش وتهدي
كنت بوقف بـُعدك عني فيها كتير
عايزك جنبي لكن قدري وهو مكتوب
أني أكمل وحدي أنا من غيرك الباقي من عمري
وعمري الباقي أكون فيه وحيد
لكن يا هوبه أنا من غيرك كأني ضرير
كنتِ عينية اللي بشوف بيها
أيامنا الحلوة وأنتِ معايا
لكن لابد لها دي نهاية
سنة الحياة يا غالية
أنك تمشي وتبعدي عني
في طريق ثاني
وأنت يا هوبه من صغرك جنبي
حبيبة بابا
خلاص يا حبايب هوبه أهي كبرت
شفتو أزاي أربي وكبر وأوهبها
كتير من عمري وفي أخرتها
أسيبها لزوجها
بس الحمد لله هو طيب وآبن حلال
وأديني بدعيلها يا رب أسعدها
وأجعل بيتها كله عمار
بدعي يا هوبه لربي في كل صلاتي
يسعد قلبك ويهنيكِ
ويرزق قلبك وحياتك بأحلى وليد
أو يملا فرحة بيتك بغنوة جميلة
أمورة وحلوة زيك لما كنتِ صغيورة
هبه يا حبيبة قلبي وروحي
خلي ذكر الله على طول في لسانك
و تملي في قلبك وأدعي لربك يهدي سركِ
هبه يا حبيبتي أوعي تنسي بابا يا عمري
وأفتكريني لما أموت
أني عمري في يوم ما حرمتك من حاجه طلبتيها
كل أمنية لكِ في حياتكِ كانت تتحقق على طول قدامك
وأدعي لبابا حبيبك أن ربنا يرحمني
وتكون نهايتي وفراقي أنا عنكم
بختام رسالتي معاكم بجوازك أنتِ وأخواتك
وأني أنهي حياتي وأنا فرحان بيكم
متجمعين حوليه وأنا بينكم وشايفكم
عيشين حياتكم سعداء حبايب متجمعين دائماً
مع مامتكم في البيت إللي تملي كان بيجمعنا
بحب وخير وسلام وأمان
كلمات من قلب بابا
لـ هبه حبيبة قلبي