فِي شْوَارِع المْدِينَة مْشِيتْ
نِـجْـرِي نْـتَـبَّـعْ فِي خَـطْوَاتِي
نِـتْـبَـسِّمْ كُـلْ مَـرّة لْحِـيـط
ونَـضحَكْ.. تِـغْلِبْنِي ضِحكَـاتِي
يَـا حَـسْـرَة قَـدَّاشْ جْـرِيـتْ
فِي الحُـومَة مْـعَايَا صَحبَـاتِي
لْـعَـبْـتْ الغُـمِّيضَة تْخَـبِّيت
هَـا الشَّـارِع حَـافِظْ كِـلْمَـاتِي
يَـسْـمَـعْـنِي إذَا غَـنِّـيـت
يَـعـرِفْ صُـوتِي وغْـنَايَـاتِـي
وزَادَة يَـعْـرِفْ إذَا بْـكِـيـتْ
يْـوَاسِينِي يْكَـفْـكِـفْ دَمْعَـاتِي
*******
لِـشْـوَارِعْ المْـدِيـنَـة حْكِـيتْ
عَـالطُّـفْـلَـة اللِّي كِـبْـرِت فِـيَّا
تــركِـتْ لُـعْـبتْـهَا فِي البِيت
وضحْـكِـتْـها في كلّ ثْـنِـيَّة
ظْـفِيرَة مَـدهُـونَـة بِـالـزِّيت
وصُوتْ أمِّي كِ يْـنَادِي علِيَّا
سْـنِين تْـعَـدِّت مَا عَـدِّيـت
عُـمْـرِي يِـجْـرِي.. يِجْـرِي بِيَّا
فِي بَالِي طُفْـلَـة ويَـا لِيت
هَا الطُّـفْـلَة صَبْـرِت شْـوَيَّـا
نْـزَعْت الڨُـربِـيطَة.. تْـمَـنِّيت
نِـكْـبِـر.. لَـكِـنْ بِـالشْـوَيَّـة
لِـشْـوَارَعْ المْـدِينَة حْكِـيت
عَـالدّنْـيَـا اللِّي هَـرْبِـتْ بِـيَّـا
