ماتكحَليش ف عيونك الضحكة …..بقلم سعيد_شكرى

ماتكحَليش ف عيونك الضحكة
خلّىِ الكلام من غير حَرج يُحكىَ
طاب يُحكى أن وقد مايُحكىَ
مافيش كلام يوفيكى يوم حَقِك ..!!
ماتزوقيش الورد فوق خَدك
إِسقيِه مودة يبان على قَدِك
وتبانى زى زمان ومين قَدك
مترصَصَة الخُطاب على السِكهَ ..!!
خلّیِ الكلام من غير حَرَج يُحكیَ ..!َ!
ماتقربيش الروج من الشِفّهَ
واللولى ع الصفين بيتدفى
آن الآوان للطُهر .. والعفه
ده الشارع المكبوت على تَكّهَ ..!!
خلّیِ الكلام من غير حَرَج يُحكیَ ..!َ!
ماترسميش تاتو علی الحاجب
سيف الهلالی ع العيون حاجب
فارس وحارس واللی مش عاجب
يشرب من المالح .. ويتِكّه ..!!
خلّیِ الكلام من غير حَرَج يُحكیََ ..!َ!
وماتلبسيش الكعب م الهزاز
باﷲ عليكی الناس قلوبها ازاز
ح يجَرّحوكى وانتی بنت عُزاز
ماتحِمليش م السو لو شَكه ..!!
خلّیِ الكلام من غير حَرَج يُحكیََ ..!َ!
ولا تلبسيش فستان ومتحزق
قلب الولاد عصفور وبيزقزق
قومی إفتحی للفجر بيشقشق
دی الشمس عايزه تهِل من عكا ..!!
خلّیِ الكلام من غير حَرَج يُحكیَ ..!َ!
خليكی زٍی الفرح شئ قادر
يعدِل مايلّنا .. حتى لو نادر
قلبي نصبته .. للفرح شادر
وداس عليه الحزن .. وإتِكّه ..!!
سيبي الكلام من غير حرج يحكى ..!!