حبلت سماك بغيوم واكحة
ونهارك القصير تسمرات فيه
شمس لافحة
معصور بقبضة الغدر
تلالي من هموم
والبرودة فعروق قلبك سارحة.
فالليل تحلم حلمة شينة
وتشوف النجوم من سماك طايحة
إيه يا شجرة الفرحة ذبلات فيك الاوراق
والواد الجاري حمل بحجار الغبينة
من دموع العين طايحة.
السبوعة الي كانو همة وشان
تحزمات بخلاخل الذل
وفرقعة الضامة شاطحة
يحسن عوانك يا الهايم
تنسج ايامك بين النافخة والنايحة
فين ترد داك الراس
الي كادب عليه برزة كارحة
الجنان الي ترعاه وكح
والورد الي تجنيه بدم القلب
مابقات ريحتو فايحة.
يا الهايم ريب داك السور
الرجا فبنادم راه مبتور
لا تقول ضعيف الحال ولا مسحور
دعي مولاك بدعوة زينة
يتلاشى الهم و تزول الغبينة
يعود جنانك زاهي و راوي
صفي خاطرك ولا تحمل فقلبك ضغينة
يصفى الحال وتهدى المواج
وبراحة الله ترسى السفينة
