ما بدي أسأل عن يلي جرى
وعن يلي صار
ولا بدي أتنسم توافه الأخبار
دربي بيعرف خطوتي
ومشواري بيحلى مع الأشعار
مشغولة بالعطر بالنوار
وبزرع بالمدى نهار بعد نهار
ناطرة قلب صافي
تا أهديه ها الأسرار
كل يوم عندي مع الشمس مشوار
وبالليل بسهر مع الأقمار
بدندن والناي شاهد
والوتر يحتار
ما بدي وجع ولا دمعة
وبيكفيني لمّا مرّ لعندك
لملم ورد وعطر هالأزهار
سألوني مين الأجمل
إيروس أو عشتار
قلت الجمال ما بيخلص
ومو شغلتي قسم الأدوار
طبعي بكتم الهوى
بس ليش الهوى
ثرثار!!
يمكن..
يمكن نسي إنو الصمت ستَّار
