هذيان…..بقلم إيمان الميهي

كل المساحات المشغولة
شيفاها “فراغ”
والناس أجساد
شفافة وباردة ومطفية
وكأنّي بقيت
طيف حلم وراح
دوشة ومش سامعة أنا ولا كلمة
وحاجات بتخبّط فيّا كتير
الصوت من جوايا بيعلى
لكن حواليا الصدا أخرس
ومساحة ف روحي افتراضية
مفروض هنا قلب
مفروض هنا عمر
مفروض هنا روح
مفروض هنا فرح
مفروض هنا جرح
ألمي أنا ف الغالب مش ملموس
ولا يمكن اشاور حتّى عليه
وكأنّي مافيش
الناس مرّات مش شيفاني
وساعات انا شيفاهم أشباح
أجساد فاضية
من غير أرواح
طعم السكّر زيّ الميّه
والفرح عياط
والحزن بضحكة بيتألق
ف خريف بردان
وبرغم البرد بيقلع كل هدوم العمر
ويتعرّى
الكون عريان
من كل عناصر تكوينه
إلا الأفكار
تماثيل عملاقة ومصلوبة فوق الأحلام
والوعي ؟ كلام
فانا مش مستوعب ولا حاجة
كل المساحات المشغولة
شيفاها “فراغ”
والناس أجساد
شفافة وباردة ومطفية
وكأنّي بقيت
طيف حلم وراح
ــ