واداويك بإيه يا جرح السنين
والآهة طالعة منك بحرقة
تقيلة شادة معاها الأنين
اتشعلقت ياما في حبال الأمل
أقع واقوم
واشيل في هموم
على ضهر عمر جعان محروم
يبص لقصر بناه في خياله
وطلع مسكون
وينزف مع كل نظرة
ملايين آهات للحسرة
اداويك بإيه وانا شايبة أحلامي
وشاخت عيدان الصبر في عيوني
دانا ياما الدنيا بعزقتني
على رصيفها وشاطتني
كما الكورة من سور لحيطة
وبقيت ألملمني حتة حتة
والزقني واطمني
واشبع روحي بكلمتين من الذكرى
عشان اقدر أكمل واستنى بكرة
وهو جايبلي هدية صبري
متزينة بالفرحة
فتتبدل دموعي لنجوم متزوقة بضحكة
وأنسى كل أسايا
واسامح من جوايا
كفوف اترسمت على خدود أيامي
وغرزت في مسامها أشواكها
اداويك بإيه
ويا مكتر الأطبة
على الضفاف والسكة
ده في ايده مشرط
وغيره بيجهز الإبرة
عشان يخيطني
ويشلفطني
بألف ومتين غرزة
وأهاتك وانت متبنج بكلامهم
بعد ما قطعوك وغرزوا فيك إبرهم
نغمة تفرح قلوبهم
إشارة لنجاح العملية
وترجع تفتح عينك
تقوم تاني من سريرك
وتقعد على جبل عالي تستنى
شمس العهود تشرق
وتدي الإذن للعصافير
ترسم على كعوب زمانك الحنة
