كثير غنينا ولعبنا
وقولنا حكاوي ما تعبنا
وحوِّلنا الهوا لزهور
وحلم ظهور مغلبنا
بنمشى قد ما بنمشى
ونسرح فى الحياه سرحان
لا بيعنا فى يوم ولا عادشى
فاضل فى العمر غير عنوان
وصوره بس ع الحيطة
بتحكى حكاية فى الماضى
وكات عملالها تحويطة
لكن مين فينا كان راضى
يكون ذكرى وما بيده
بإيد ربك هو القاضى ّ
وشوف فرعون ومين هدُّه
ومين فى الخُلد كان ماضى
نَفَسْ داخل نَفَسْ طالع
وصوت محسوب لأى لسان
كأنه بيقرا فى الطالع
ويحكى حكاية بالألوان
ويحسب حسبتة لنفسه
كأن الدنيا دى بتاعته
ومين فى الدنيا هينافسه
يحضَّر شره ويباغتة
ويتعامل كأنه اله
وإن الكون دا له واحده
وطول ماقوته جواه
بينسى الضعف لو هدُّه
لكن فى نهاية القصة
بيرجع صوره ع الحيطة
ويفضل جزء فى الذكرى
رابطنا بعُقدة بشنيطة
