يا مصر
بتعمليها إزاي؟؟!!)
بتعلى عليكي أسعارك
وتطفي ببسمتك نارك
تنامي جعانه ما يضرش
وتصحى تحفي بالمشاهير
مفيش تقدير
وكل العيشه مدينه
ولسه عايشه مستوره
وينهش فيكي كل حقير
ولا تبكيش
ولا تشكيش
وما تخليش من التلطيش
رشاوي تمشي مصلحتك
تطاطي لكل كلب جعان
عشان تمشي الحياة بيكي
وما تكليش
فما تخليش في جعبتك أحلام
ولو صبح العيال أيتام
ما يقلقيش
تقولي ربنا موجود
وجوده تجودي بالوجود
لئيم يطلق عليكي صقور
حدادي تختطف المستور
رغيف ضايع
وملح مفيش
وضغط وسرطانات بالكوم
ولسه بتضحكي في الدور
طابور تصويب
ب١٠ جنيه
طابونه وعيشها كله رٓجوع
وزحمة في مستشفيات فاضيه
وقاضيه تأخدها ف عيادة طوارءنا
دكاتره جزارين أموات
لا عندهم مهنة ولا ذمة
ولا ريحة ضمير صاحي
يبعوا كل أعضاءك
في رسمة قلب
و يشفطوا دمك السايح
في حلقة زار
ودوارة يا دنيا بينا دوارة
ونوارة اللي كانت وسطنا فرحة
تشوفها وشوشنا حرانه
وغرقانه
في وحل الدين
واكلها إبنها التالف
وناطف كل ريشها الحي
ومستني خبر موتها
عشان ما تخلي له الدنيا
يجيب أهل الخراب فيها
يعمرها
بكل ما يمحي أمجادها
وسلسالها
وناسها اللي بلا معنى
بتضحك بس على روحها
وعايشه مسالمه للخوازيق
بتلبسها بكل أريحة وسهولة
بحجة إننا عايشين
يا مصر يا بوئجة التراحيل
في شرد الصيف
في قلب بؤنة التجميد
ما عادش ينفعك أمشير
ولا حتى ربيع تاني
خلاص قفلوها بالجنازير
سداسية
و حاوطونا بالديناميت
من اول حدها الفرات
لحد حدودنا نهر النيل
و بيشاوروا علينا هناك
وبيقولوا….
(يا مصر.. عملتيها إزاي)
يا مصر إزاي؟؟؟!!!!
وقادره إزاي……؟!!!
يعيش فيكي البشر أموات
ويحيا فيكي كل ليئم ؟!.
