ماكنش بيقفل الأبواب
على روحه اللى مفتونة
بصورة بنت مجنونة
تملى بتخلق الأسباب ..!!
وتقلب .. فرحته .. زعلة
ويبكى وهى مش سائلة
وتمشى و “حسها” بيعلا
وتحبس ضحكته ف قمقم ..!!
مافيش اعذار ..
مافيس أسفة ..
فا يتلغبط .. من الكسفة
تلون .. وشه .. بالكركم ..!!
يسيل منه العرق .. ويجف
ويبلع ف المرار .. ويسف
يعلق .. ساقيته .. ويلف
بطول السكة .. متغمى ..!!
ونفس الدايرة .. تتكرر
ومين بس اللى بيقرر ..؟!!
تخش العتمة .. ويسمى ..!!
يدب الخوف .. فا يتصور
ضوافر قلبها.. تعور
يلم .. ضلوعه .. يتكور
“ف” أصغر حتة من جلده ..!!
يخاف “م” النسمة لو هبت
يعذب نفسه لو “عبت”
وينسى اللى إحترف “جلده” ..!!
ويقطف من غيطان الصبر
كام موال .. يقيس بالشبر
من طول الوجع .. والكبر
“ف” روح البنت .. و”ف” عجزه ..!!
يلاقى الحسبة .. مش عادلة
مادامت عيلة .. وندلة
وليه حب اللى مش .. عايزه ..؟!!
سؤال يطرح عليه نفسه
ومن يأسه .. يلاقى الحل
زى الخل ..
خفيف “ع” المعدة كل ما قل
وتفضل هى جواه الوطن .. محتل ..!!
