غُربه ….بقلم محمود الطويل

وركِبت – بحكم العاده – ف عز الضُهر التل طوار
مشوار
بياخدنى يوماتى لباب الدار
من سور السجن
ولإن الشمس نيران
حطيت فوق من راسى الجرنان ومشيت
سارقانى الأفكار
الريح بتصفّر ف ودانى
وضجيج ..
وغبار
أرتمى على أول قهوه نادانى الكرسى الفاضى على بابها
على فين وازاى؟
والزمن الجاى؟!
أبَّاى
دا السجن – برغم الغول جوّاه –
مغسول بالنور
وترابه – على رغم السور –
مستكه وبخور
مَا بقاش إلّاه
وجميع ما عَدَاه
فى بلادى بينطق بالعبرى
١٢ أغسطس ١٩٨٨
( من ديوان / طرْح الهَوَى )