أغنية…..بقلم أحمد سماحه

سكون عنيف مخاوى
شياطين إنس وبلاوى
وليل على حيله شايب
لاوى رقابى الغناوى
ومفرود زى مارد
ومعجون بالحكاوى
وف كل لحظه طالع
من ضلمة الشوارع
ومن قلب المواجع
عنيد وما لهش صاحب
حاولت العمر لكن
أسأل ولا مره جاوب
وتركني في حيرتى أمشي
وأتخبط في المواكب
موكب شايل جنازتى
موكب فى ضلوعى غايب
وموكب من دمايا
تايه وما لهش غايه
ينده ولا حد يسمع
يزعق ولا فجر يطلع
يصبح زى الحكاية
أخاف لصمتى ينطق
وأخاف من كل مركب
تركب بحر الغواية
سكون عنيف عنيف
غطى كل الشوارع
وعشش ع الرصيف
يشرب من نهر خوفى
ومن عودى الرهيف