لو يوم فكرت تزعل……بقلم محمود يونس

لو يوم فكرت تزعل
وتعيش دور الحزين
إفتح كتاب حياتك
وشوف تبدأ بمين
هتبدأ ب اللى باع
ولا اللى وثقت فيه
وكان طبعه الخداع
ولا الصاحب اللى كان
ولا الحب اللى هان
ولا اللى كنت شايفه
ملاك وطلع شيطان
ولا هتزعل عشان
الراجل اللى واقف
فى إشارة المرور
وممكن يشتمك
ولا الراجل اللى بص
بصه فيها إحتقار
من غير ما يكلمك
ولا هتزعل عشان
الطبع مش لطيف
ولا الراجل الغلس
وفاكر دمه خفيف
ولا الأستاذ شريف
وطبعا مش كده
والست أم إبتسام
على الكل منكده
وناس متعوده
تكره تحقد وتجرح
وناس بالناس بتسرح
ومسرح
واللى يكسب
اللى بيمثل أحسن
وحاجات فى الدنيا
تحزن
وحاجات أكتر تجنن

ولا هتزعل عشان
مفيش فى الدنيا حد
ممكن يتحملك
ومفيش فى الدنيا حد
إسمه بيكملك
ومفيش فى الدنيا حد
بيحس بيك بجد
هتزعل م اللى كان
ولا تسيب الزعل
لحاجات أكتر هتحصل
ولا لاوقات ومرت
كنت فيها المغفل