الثلاثاء , أكتوبر 20 2020

شيرين بدران تكتب …..العلاقات الناضجة

  • العلاقة بين طرفين بتجمعهم مشاعر الحب ، أهم سمة لازم تتوفر فيها هي النضوج 
  • النضوج العقلي والنفسي اللي بيضمن الإستمرارية في العلاقة ؛لأن العلاقات غير الناضجة مش بتدوم كتير ومصيرها الفشل مهما طالت الايام.
    قبل مانحكم عن نضج العلاقة أو لأه؟ لازم الأول نعرف اساسيات لابد من توافرها قبل بداية اي علاقة ،عشان لو الأساس مش سليم أي حاجة هاتترتب عليها بعد كده هاتبقى فاشلة؛ لأن مابني على باطل فهو باطل.
  • أولا:- قبل ما نقبل على الإرتباط ،لازم نكون مدركين لشيء مهم جدا إننا مش بندور على الحب ؛الحب هو اللي بيلاقينا ،ومش بنقع ف الحب ؛إحنا بنسمو للحب ،لان الوقوع زي ماهو متعارف عليه هو الهبوط من أعلى إلى اسفل وده بيرمز للتدني ،وهذا اللفظ لا يليق أبدا بأنبل وأجمل مشاعر ف الوجود مشاعر الحب.
  • ثانيا :-الحب الناضج هو الحب الأبدي ،اللي بيكون ف إطار ديني وإجتماعي سليم ،و ف مجتمعنا الشرقي الحب الناضج هو اللي بينتهي بالزواج ،الحب اللي ف النور ،و لازم مايكونش في عراقيل تتصدى للعلاقة ،يعني يكون السن للطرفين مناسب ،وتكون الظروف المادية بتسمح بالزواج ،والظروف الإجتماعية كمان لازم يكون في تكافؤ إجتماعي وثقافي بقدر الإمكان.
  • ثالثا :- الحب معناه هو الإطمئنان والأمان والإستقرار النفسي ،ولازم الطرفين يكونوا مع بعض من غير أي هدف أو مصلحة، إلا تكوين علاقة تدوم للابد ،سواء كان الهدف مادي أو جنسي ،أو حتى هدف تكوين أسرة وبس أو لمجرد ماحدش يفوته قطر الزواج ،العلاقات القائمة على تبادل المصالح بتبقى علاقات غير ناضجة ومش بتستمر كتير.
  • رابعا :- الحب الناضج هو الحب السهل ،اللي مافيهوش إستجداء للمشاعر او إستعطاف أو إستغلال،
    والإستغلال مش بس جسدي ،ده في إستغلال عاطفي كمان ،اللي هو إستنزاف مشاعر الأخر دايما بخلق محيط ملبك بالدراما، وإفتعال الأزمات لإختبار مشاعر الأخر ،ووضعه دايما كأنه ف إختبار ،يا جماعة الدراما وإفتعال الأزمات ده إسلوب طفولي جدا ،ولا يليق أبدا بشخصيات عاقلة وناضجة وعايزة تكون علاقة ناجحة ؛لأن الحب الناضج هو اللي بيريح البال مش بيتعبه ،ولو بتفتعل الأزمات عشان تتأكد من حب شريكك يبقى مافيش ثقة ،وبالتالي في شك ،والشك عدو لدود جدا للعلاقات الناضجة.
    طالما حبينا بعض حب ناضج ،يبقى لازم نكون واثقين ف مشاعر بعض جدا وبالنا مرتاح .
  • خامسا :- الحب الناضج عمره ما بيتبني على تعاسة الأخرين ، لأن الحب اتخلق عشان يسعدنا ويخلق طاقة إيجابية تنعكس على كل المحيطين ، ولو الحب ده هايسبب ضرر لمخلوق ،يبقى العلاقة من الأول فاشلة ومش هاتستمر وبالتالي مش ناضجة
  • صفات العلاقات الناضجة
  • الحب الناضج هو اللي بيعليك وييخليك تصلح من نفسك وتحب كل اللي حواليك وينجحك ويقويك ويطمنك
  • الحب الناضج بيجاوب على الأسئلة مش بيطرحها يعني مافيهوش أسئلة من نوع ياترى بيحبني ؟ ياترى علاقتنا هاتستمر؟ ياترى بيخوني ؟ ياترى بجد بيحبني ولا بيضحك عليا ؟ وهكذا 
    يعني الحب الناضج هو اللي بيطمنك وبيزرع جواك اليقين والتأكد من مشاعر الأخر دون أدنى شك
  • الحب الناضج بيصحبه نضج عمري وعقلي وفكري وجسدي وإجتماعي بيحوي كافة أنواع النضوج
    وقبل الخوض ف أي علاقة لازم تتأكد إن في تكامل ف نضجك عشان العلاقة تستمر
  • الحب الناضج إتخلق عشان بس ينجح ويستمر لأخر يوم ف عمرك ومش عشان يفشل ولو فشل لأي سبب فده بيكون قضاء وقدر ونصيب ربنا
  • الحب الناضج هو اللي بيشبع إحتياجاتك ورغباتك ومش بيسيب جواك أدنى إحتياج لحب لتاني يعوضك نقص بتعيشه مش بيبقى عندك نقص وعندك رضا وعندك القناعة الكاملة بشريك حياتك .
  • الحب الناضج الشريكين فيه بيكملوا بعض ، وبيتعلموا من بعض وبيقوموا بعض وممكن توصل إنهم يربوا بعض من أول وجديد دون سيطرة أو إستغلال أو فرض الرأي لمجرد إن رأي واحد فيهم يمشي وخلاص وبيكملوا بعض مش معنى إنهم يبقوا شخص واحد لأه يكونوا شخصين ناجحين وكل واحد يعوض النقص اللي عنده من التاني.
  • العلاقات الناضجة بتكون عميقة لأبعد مدي والسطحية والتدني لا يليق بها أبدا
  • العلاقات الناضجة لا تهتم بالماضي أو جروح الماضي أو أخطاء الماضي الشركاء الناضجين هما اللي بيدوا جروح بعض وبيصلحوا اخطاء بعض وبيساعدوا بعض عشان يجتازوا كافة أنواع المحن مع إنكار كامل للذات وعدم إذلال الأخر بشكل أو بأخر لوقوفه جنبه أو لتصحيح أخطائه أو إنه ضيع عمره وهو بيساعده وواقف جنبه .
  • الخلاصة
    الحب اما لعبة ها تنتهي أو إحساس جميل ومشاعر نبيلة بتدوم للابد. 
    إما غلط أو صح.
    والشركاء إما ناضجين أو غير ناضجين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: