السبت , أكتوبر 31 2020

ريهام عرفة تكتب : من يوميات زوجة عادية..عادية خالص..عادية جدا

  • النيل العذب هو الكوثر .. و الجنة شاطئه الأخضر
    ريان الصفحة و المنظر .. ما أبهى الخلد و ما أنضر 
    – ها يا يا حبيبتى يعنى أيه أنضر ؟؟ 
    – يعنى أجمل 
    شااااااااااااااطرة ..طيب عكسها ؟
    – عكس أيه ؟؟
    – أنضر يا بنتي ركزي معايا 
    – سهلة….. Above 
    -حبيبتى انتي ناوىة تموتينى مشلولة ؟؟ ده عربى و ده أنجليزى عكسها ايه علشان متهورش عليكي 
    – عكس اجمل ؟؟ أوحش 
    – مفيش حاجه فى العربى أسمها أوحش أسمها أقبح و مش ده المضاد
    – مش عارفة 
    – مضاد أنضر ..أذبل 
    – أنا مشوفتش أزبل من كده…. بذمتك ده كلام أذاكرة ؟؟
    -أتأدبي يا بنت…. أذبل من الذبول مش من الزباله 
    – ماما … هو حضرتك مقتنعة باللى بتذاكريهولى ده أنه حيفيدنى فى حاجة 
    – مش أوى بس أكيد حيفيدك تبقى بتتكلمي و بتكتبي كويس…. بطلي رغى و ركزي ..ما الجمال فى النيل هو الكوثر ؟؟
    – تعبير جميل 
    – هاااا و بعدين 
    – لا حضرتك قولتى كل ما أقولك ايه الجمال تقولي تعبير جميل و أدينى قولت 
    – يا بنتي خلى يومك يعدى… كل حاجة و ليها سبب…. ده جميل لانه شبه جمال النيل بنهر الكوثر فى الجنة 
    – على فكرة الراجل محمود فهمى ده كذاب 
    – أسمه أحمد شوقى يا كائن أنت و ايه اللى خلاه كذاب 
    – لأنه مشفش فالكوثر ازاى يقول انهم شبه بعض؟ …. و بعدين الدرس اللى قبل ده على طول خدنا أن النيل مليان زباله و مخلفات و الحيوانات بتستحمى فيه و مفيش حيوانات بتستحمى فى الجنه 
    – ………………………..
    – ماما ..أنتى ساكته ليه ؟؟ 
    – …………….. 
    – تصبحى على خير بقا أنا داخلة أنام 
    – و أنتي من أهله
    …………………………
    اللى عنده رد يقوله علشان أنا مكبوسه من ساعتها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: