الأربعاء , يناير 20 2021

وفاء الألفي تكتب : وماخفي كان أعظم !

  • النهارده عاوزه افضفض معاكم شويه ، لانى لو ما قلتش اللى جوايا حاطأ، كمية السلبيات اللى محوطانى من كل اتجاه تخض بجد. هو احنا ليه بقينا وحشين قوى كده ، هو العيب اصبح فينا والا فى العاملين علينا ( الجهات الحكومية ) والا والمسؤلين، بصراحه حتى شوية المبادئ اللى كنّا متمسكين بيها كل واحد بيشكلها على هواه.. نمسك اجزاء انا لامساها بنفسى .. – الاكل والمشروبات .. اللى بتشوفه من الاعلام يخليك ما تأكلش ولا تشرب وتموت احسن من كمية العفن الذى يقدم لنا ونحن لا ندرى ، مفيش رقابه يقولك هو احنا حا نعمل ايه والا ايه ، الغلاء عدى سقف التوقعات – خش على التعليم ، تسمع عن احوال المدارس والمدرسين يرثى لها ام ايه … القطاع الخاص فتح مدارس طالما الحكومه مش عاوزه تعلم ، وجزء من الشعب حاول يجى على نفسه علشان يعلم ولاده ويقوم لدور الحكومه ، وده حا يطّلع منه خميره جميله تواكب التعليم الحضارى.. تقوم الحكومه ترفع ضرائب الى هذه المدارس بنسبة ١٧٪ ، تقوم المدرسه ترفع المصاريف .. يعنى انا اساعد فى انى أقوم بدور الدوله فى تعليم ولادى تقوم الدوله تعاقبنى يا حلاوه… – ندخل على العلاج .. مفيش علاج على الدوله والمريض اللى معاه بطاقه علاجيه لو دخل مستشفى حكومى تلاقى دكاتره الامتياز اللى لِسَّه ما اتخرجتش بيعملوا على المريض تجارب وابحاث، ايوه زى اللى بتشوفهم فى الأفلام الكوميدي، طب اخبار المستشفيات الخاصه ايه .. مش حاتكلم عن الأسعار اللى اصبحت فوق طاقه الموظف حتى موظفين القطاع الخاص فلوس العلاج غير متوفره عليهم .. مع ان ده دور الدوله ، وتلاقى الاعلام مسودين عيشتنا بالاخبار الزفت والوضع الزفتين..
  • طب اييييه !! وعاوزين الشعب يساعد ويتعاون و هو بيشحت يشحتوا منه ، والنبى هو فى كده ، انا مش عارفه اصوت والا اعيط والا الطم والا اضحك من الغلب اللى الناس فيه .. طب لو اى حد عنده حل فى اى حاجه فى اى حته يقوله يمكن كلامنا لو اتكرر حد يسمعنا …. انا عارفه انكم مش ناقصين بس مش لازم نحطش راسنا زى النعامه وندفنها فى الرمله لان حا ييجى يوم ونتخنق… انا باقول كفايه فضفضه لغاية كده .. انا ذكرت فقط اولويات الحياه ..الاكل.. التعليم.. العلاج.. وما خفى كان اعظم .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: