فيس وتويتر

ميريت رمسيس تكتب : المسيحيين ريحتهم وحشة ..!!

يا جماعة الخير انا حظي اسعدني النهاردة و قابلت انسان حقيقي معتقد أن المسيحيين ريحتهم وحشة فعلا و ان ده مش تعصب ضدهم و لا أكذوبة. . و ده مش الإنجاز رغم اني كنت اول مرة اسمع الأسطورة ديه من الفيسبوك .. الإنجاز بقا انه معتقد ده عن قناعة علمية معملية اجتهد في إثباتها بلينكات من كلها بالانقليزي و هو شخص شيك و كده مش اي كلام و مهندس .. و بيقولك ديه مش عنصرية اصل الفايبرز بتعمل انتفاخ ! يعني سايب البقوليات و بيقولك الالياف .. يا واد يا علمي .. بقوله يا فندم احنا شعب بيفطر فول و الحر مبهدلنا شافعي و مالكي و ارثوذوكسي .. بينما الالياف ديه اللي ماسك فيها باستثناءات قليلة “كاستغفر الله التفاح و البروكلي” مضادة للامساك فالأنتفاخ .. البوست مش للتحفيل عليه و لا شتيمته خالص .. الفكرة ان الخلطة ادهشتني .. الراجل في الاخر لما حس انه مصممة البسه تهمة سيخين كفتة إعجاز علمي طائفي و هو بيريئ كومبليتلي راح شايل الكومنت و أمره لله ..

و بالمرة عشان نبقى استفدنا حاجة من حوار الفايبرز ده يا شعب .. احب اقول لشركائنا في الوطن الاخوة المسيحيين .. حلوة مني .. انهم مسئولين جزئيا عن نجاح عملية نشر الاساطير عنهم .. لان الانسان عدو ما يجهل .. و تقوقع نسبة كبيرة من المسيحيين على نفسهم لاسباب بعضها خارج عن ارادتهم و بعضها لأ ده بيسهل طريق كل من متطرف متعصب يسعى لبث مفاهيم مغلوطة عنهم او عن المسلمين عندهم .. قصاد كل صداقة بين اتنين بس .. مسيحي و مسلم ..بتتكسر اساطير طائفية مسكوت عنها يمكن عند عشرات .. اندمجوا انتشروا انصهروا لا تقفوا مثل المسمار

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى