خمسين نيورون .. فى معرض القاهرة للكتاب .. للكاتب الواعد محمد فياض

*يناير ١٩٨٤*

-بابا هو ايه المكان ده؟!

*ده معرض الكتاب

-يعني ايه؟!

*مكان كبير مليان كتب من كل العالم..

-اللللله!.. حلو اوي المكان ده يا بابا!.. الناس و الكتب شكلها حلو اوي!

*ايوة… دول الناس اللي بيحبوا القراءة و مثقفين.. ها مبسوط؟

-ايوة يا بابا اوي!

*طب قول الحمدلله.. و هجيبلك شوية قصص عشان تقرأها ف الإجازة..

-الحمدلله الحمدلله.. شكرًا يا بابا انا فرحان اوي!

—————–

*يناير ١٩٨٧*

-بابا بص انا لقيت ايه!

*ايوة دي أوراق بتاعت جدك الله يرحمه

-دي جزء من قصة يا بابا؟

*ايوة.. جدك كان بيكتب احيانا.. و الورق ده بتاعه

-أسلوبه رائع !!.. نفسي اعرف اكتب زيه!

*اهم حاجة مذاكرتك الاول.. و بعدين اكتب زي مانت عايز..

—————-

*يناير ١٩٨٩*

-دي اخر حصة قبل اجازة نص السنة.. الواجب اللي هتاخدوه يتعمل!..

قسما بالله اللي هيجي بعد الإجازة مش عامل الواجب ها………..

انت يا محمد زفت!

*ايوة يا أستاذ!

-مش مركز معايا ليه؟؟.. بتهبب ايه؟؟.. وريني كده مخبي ايه ده؟؟

يا نهارك اسود!!.. رواية؟؟؟؟؟؟..

قوم أقف!!!.. وريني شنطتك دي!..

ايه ده؟!!!!!!!

روايات و قصص؟!!!!!!!

يا تيسير، روح نادي الناظر بسرعة!!!!..

الناظر: ايه يا أستاذ عادل في ايه؟ مالو الطالب ده؟!

-كان قاعد سرحان ف الحصة يا أستاذ طاهر!.. و بالتحقيق و التفتيش، لقيت ف حيازته مجموعة روايات و قصص ف شنطته!!!

الناظر: روايات و قصص؟؟!!!.. الطالب ده يجيلي فورا على المكتب و يتعمله استدعاء ولي أمر عشان نعرف ايه اللي خلاه يمشي ف الطريق ده!!..

-طبعا يا أستاذ طاهر.. بس بعد إذنك هوضبه هنا بكام عصاية عشان يكون عبرة!!.. الموضوع ده ممكن ينتشر!!

الناظر: تمام يا أستاذ عادل.. بعد ما تعاقبه ابعتهولي على المكتب!!!..

——————

خمسين نيورون .. في معرض الكتاب .. للكاتب الواعد محمد فايق

*يناير ١٩٩٢*

-ايه ده؟؟..

*ايه يا فايق في ايه؟

-تعالي شوفي ابنك كاتب ايه ف كشاكيل المدرسة!!

*ايه كاتب ايه؟؟

-كاتب قصص يا باشمهندسة!!.. القصة اللي سيادتك اشتريتيهاله الأسبوع اللي فات بوظت دماغه!..

*اعمله ايه بقى!.. مانت عارف ابنك عنيد و مابيسمعش كلام حد!.. و بعدين موضوع القراية ده ادمان بالنسباله.. سيبيه بقى!

-الواد ف إعدادية!!.. هيسقط!..

و بعدين هو انا بقول ما يقرأش؟!!

مايقرأ و كل حاجة، بس ف الإجازة!

*قوله انت بقى الكلام ده!

 

-لا قوليله انتي.. مش انتي اللي بتديله فلوس يجيب قصص و روايات؟!.. و على فكرة بقى، لو سقط مش هوديه مدارس تاني!.. يروح بقى يشوفله صنعة!

*ماتكبرش الموضوع بقى يا فايق.. هو من امتى محمد سقط؟!..

-ماهو بالمنظر ده هيسقط!..

و بعدين هو فين البيه؟!

*راح معرض الكتاب!

-كمان!!.. طب لما يجي بس!..

—————–

*يناير٢٠٠١*

-ايه ده يا دكتور محمد؟

*دي رواية كدة بحاول اكتبها

-رواية؟!.. هههههههههه

*ايوة رواية

-عن ايه يعني؟!

*جريمة قتل.. رواية بوليسية يعني و كده..

-هههههه.. ماشي.. ربنا يوفقك..

————-

*يناير ٢٠١٦*

ربنا سبحانه و تعالى أراد ان كل واحد من منكم (الفانز)، يكون ليه او ليها دور ف اني أفكر أنشر الكتاب ده..

عمري ما تخيلت ان فعلا ممكن يكون في حفلة توقيع لكتاب عليه اسمي و كده.. و الله وحده يعلم ايه اللي هيحصل.. هل في ناس اساسا هتيجي حفلة التوقيع؟.. هل الكتاب هيتباع؟ هل هيفضل حديقة تراب على الأرفف؟..

بس أيا كانت إجابات الاسئلة دي، و بعد الحمد لله رب العالمين، بشكر كل شخص قرأ أو تفاعل مع أي مقال كتبته.. لان ربنا جعلكم سبب ان يكون في إمكانية لنشر كتاب أصلا!..

و بطلب منكم المساعدة بصورة مباشرة ان “٥٠ نيورون” ينتشر انتشار جيد بإذن الله عشان الناشر يوافق ينشرلي حاجة تاني..