جريدة العربى اليوم الاخبارية
لمَّا اموت يا ورد
عيَّطْ عليَّا
بس متعيَّطشْ ياما
عيَّط شويه
أنت الكبير
طَبْطَبْ
على الفراشات
واحتوي العصافير
وادعيلي بالمغفره
علشان ذنوبي كتير
وخليك ف أول صف
خُدْ العزا فيَّا
لمَّا اموت يا ورد
أرسم على الميادين
نورس وكام ورده
وناس مخلوقين ..
من حُبْ
كأنُّهم شُهَدَا
وشجره،
وبحر،
ونور
وطيبة العاشقين
وقلب مش مكسور
وجنَّه م الثُوَّار
أرسم كمان ف عينين
لناس كتير تايهين
إفتح سجون روحهم
وخرَّجْ الأحرار
يمكن يشوفوا نهار
بحُبُّهم يرضى
لمَّا اموت يا ورد
واسي صحابي كُلُّهُمْ
خَلِّيني ذِكْرَى ف ضحكهم
بٍتْخَلِّدْ القفشات
وف حزنهم..
أنشر عبيرك\طبطبه
من كل شيء..
إطْلَعْلُهُمْ
من لحظه صافيه ،
وطيبه
م الشعر،
من دفا الندوات
م التاريخ والفلسفه،
والأغنيات
من أي صوره مرهفه
من أنعم المجازات
إِطْلَعْلُهُمْ في الصِوَّر
وعنيك بتنزف وِدْ
أخر صور يا ورد
خدناها مع بعضِنا
والموج ورا ضَهْرنا
بيفسَّرْ الحكايات
ويزغزغ الكورنيش
إيَّاكْ تموت يا ورد
لَحْسَنْ أموت وبْجَدْ
لازم تعيش يا ورد
علشان أعيش
