رؤى ومقالات

د.محمد فاروق يكتب : ثوابت سياسية للعملية الانتخابية !

الجميع يعلم خطوات ترشح السيسي كرجل عسكري في 2014 .

 

فيه ثوابت لا يمكن يختلف عليها أي حد عنده ضمير للكلمة والرأي :

أولاً : الجميع و أكرر ‘ الجميع من كافة الأطياف ‘ يعلمون تماماً أن فوز السيسي بفترة رئاسية تانيه أمر مفروغ منه وبديهي ولا يحتاج لشرح .

ثانياً : الجميع يعلم خطوات ترشح السيسي كرجل عسكري في 2014 .

  • كانت الخطوة الأولى تقديم السيسي لطلب الترشح للقوات المسلحة .
  • الخطوة التانيه كانت موافقة المجلس العسكري على طلب السيسي .
  • الخطوة الثالثة كان بيان المتحدث العسكري بموافقة القوات المسلحة على طلب السيسي .
  • الخطوة الرابعة كانت ظهور السيسي على شاشات التلفزيون بالبدلة العسكرية وإعلانه الترشح .

فيه حد ممكن ينكر تسلسل الخطوات دي ؟

البعض كان من فترة بيقول ويكتب كتير إن الدولة والسيسي عايزين مرشحين كرتون علشان شكل العملية الانتخابية يطلع كويس ! … إزاي دلوقتي عايزين يتهموا الدولة والسيسي بعرقلة ترشح سامي عنان أو غيره ؟ …. مافيش منطق أصلاً في الكلام ده !

ثالثاً : سامي عنان يعلم تماماً خطوات ترشح الرجل العسكري ، يبقى السؤال الصحيح ” ليه عمل كده ” ؟ ليه أعلن بيان الترشح بعد منتصف الليل وبعد كلمة السيسي اللي قال فيها إنه لن يسمح للفاسد بالوصول لكرسي الرئاسة ؟! إيه وجه العجلة في إعلان الترشح قرب الفجر ؟ مين قرر الموعد ده لسامي عنان وبسرعة ؟!

رابعاً : إزاي سامي عنان يتقدم بورق الترشح متضمن خطاب فيه اعتراف من القوات المسلحة بانتهاء انتساب خدمته ؟! وهو الشيء اللي ماحصلش أصلاً وتم اتهامه بالتزوير فيه ؟!

يعني الدولة اللي بتقولوا انها أقنعت أو أجبرت شفيق على عدم الترشح مش قادرة تقنع وتجبر سامي عنان اللي ماعندوش أصلاً ربع شعبية شفيق ؟

هل هي محتاجة تلفق تهمة لرئيس أركان سابق من ولادها علشان تمنعه من الانتخابات ؟ …. الغريب ان اللي بيقولوا كده هما نفس الناس اللي قالوا في انتخابات 2014 إن ترشح سامي عنان مجرد تجميل للصورة الانتخابية ولعبة من القوات المسلحة والدولة العميقة ! …. هو عنان مع الدولة ولاّ ضدها ؟ ما ترسوا على بر !!! وليه عنان لما يعلن ترشحه يقول كلام تحريضي في البيان ؟ دي لهجة مين ؟

هات البيان بتاع سامي عنان 2014 اللي أعلن فيه عدم الترشح للانتخابات واسمع المدح العظيم في علاقة الجيش بالشعب والعكس ! ليه لما تيجي تترشح تقول بيان تحريضي بقى ؟!

خامساً : من يومين خالد علي وحملته قالوا مش حنسلم التوكيلات بتاعتنا في الموعد اللي قلنا عليه وهنخليها بعد 25 يناير ! طب ليه ؟ ليه وانت طول الوقت بتقول ان الإقبال تاريخي يافندم ؟

النهارده خالد علي قال ‘ كل الخيارات مطروحة ‘ وممكن ننسحب ، والإعلان عن القرار الأخير بعد يومين !

ده بقى على أساس إن الأستاذ لو مش قادر يجمع توكيلات يخرج علينا ويقول انه منسحب بسبب اللي حصل لسامي عنان واضطهاد المرشحين وعدم نزاهة العملية الانتخابية !

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى