ثقافة وفنون

حطة يابطة يا دقن القطة…..شعر أشرف شبانه

حطة يابطة يا دقن القطة
لسه بلدنا مش ع الخارطة
قلنا أهي خطوة بعدها نطة
من عـ العتبة لحد البسطة
شلنا متاعنا وهزة فـ خبطة
قلنا هـ نقزح جالنا زغطة
بدل القفزة بقينا ف سقطة
و اللي زاد الهـــم و غطى
إن الحب ما بينا ف ورطة
وسوء النية و ضعف الرابطة
و اللي شفطوا مالنا شفطا
واللي جابولنا ياعم الجلطة
هُما ولادها و احنا بشرطة
وديه ياسيدي أكبر غلطة
تيجوا تاني نشوف لنا خطة
فكر و علم ومكر فـ خلطة
ناخد الحق و نكتب يافطة
لا للرشوة و لا للواسطة
إنتي يا ستي و انت يا اسطا
كلنا لازم نضغط ضغطة
نقول للريس مطلوب شخطة
عدل بحق ماهوش بـ أونطة
قاضٍ إن كان أو ظابط شرطة
في المديرية أو فـ النقطة
أصل الشعب سيد السلطة
و احنا ولاد من نفس البطة
باين شكلي بنادي ف مالطة
اللي موافق يكتب قشطة
و الل هيرفض عنده الشنطة
ياخد بعضه و من غير مطة
ويرحم روحه من دي الورطة
احنا اخترنا الضغط محطة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى