الجمعة , سبتمبر 18 2020

ناس وناس….قصيده للشاعر محمود يونس

ناس وناس

(1)
فيه ناس برغم البعد

بتفضل عايشه فى الوجدان

وبتعلم فى قلب الناس

وناس بتعلم النسيان

وناس على قد ما تعاشر

بتبقى فى أمرها حيران

(2)
فيه ناس فاهمه وملهاش صوت

و ناس تافهه ومسموعه

وناس فى الجهل مرتاحه

وناس م العقل موجوعه

وناس تايهه ما بين الاتنين

وناس م الخدمه مرفوعه

(3)
فيه ناس من كلمه بتاثر

وناس تسمع و تتاثر

وتيجى تفسر اللى اتقال

تلاقى كلام ما يتفسر

وناس تبنى فى أحلام ناس

وإيد هدامه بتكسر

(4)
فيه ناس غريبه رغم القرب

وبيكونوا سبب همك

وناس من غير ما تعرفها

تمد إديها وتضمك

وناس صدفه بتعرفها

تشوفها تقول دى من دمك

(5)
فيه ناس رغم حرمانها

بعزة نفسها بتبان

كأغنى الناس

وناس برغم ما تملك

كتير بتعانى من حرمان

ومن إفلاس

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: