جريدة العربى اليوم الاخبارية
انتى حد السيف .. على رقاب الغلابة
انتى كلمة زيف …. ف جوقة طبالين
إنكسار الطيف .. على كتف السحابة
ينعى سيل الدم .. من قفطان ياسين
مات أبوك ياهم … من شيل الربابة
وللا مات العشق .. من طول الحنين ..؟!!
كلمينى بصدق .. عن حالك وقولى
واوصفيلى الحال .. ولو كان حتى مايل
من شوية صدق .. أصلب بس طولى
من شوية عزم .. تلقى دراعى طايل ..!!
لو على المعطوب .. نصلح فيه ونعدل
لو على المهموم .. نخفف ع اللى شايل ..!!
ماتسيبيش الريح .. تميل فيه وتعدل
ماتسيبيش الليل .. يمهد للرذايل ..!!
لمى لحم ياسين .. من ناب الديابة
لمى دم الورد .. من فرش السراير
واعدلى الموازين .. على خط الصحابة
فين صلاح الدين .. ينضف ف الضماير
احسبينى ياسين .. وشوفى مين قتلنى
شمى ف القفطان .. ح تترد البصاير
خبرينى ازاى .. ابيعك وانتى منى..؟!!
وللا اعيش إزاى .. وحبك م الكباير ..؟!!
