الخميس , أكتوبر 29 2020

من يومها طالع قلبي سقّالة ……رباعيات  مصباح المهدي

كان قلب من غير باب عملت له سور
دي مش قصيدة شعر فيها كسور
الكدبة لازم تختم القصة
والفيلم لازم ينتهي على نور

**************

أنا قيس معاذ الله أنا عنتر
فارس قصاد عبلة فتى أخضر
تؤمر أطيع تزعل أهد بلاد
تضحك أعرج بيها ع الكوثر

*****************

أنا مخترع سجلت باسمي حبيب
صورته في رحمي كيان من طيب
عمدته بالرياحين وبالعنبر
وسلكت به في مسالك المجاذيب

*********************

خارج سليم م المعركة صافي
القلب حافي والقدم حافي
بالضم خيطان الصبر واستدعي
جيش الاحتياط في رأسي واكتافي

*************

من تحت ردمك ياالأسى مرفوع
من بعد جر الحيرة نصب الجوع
فعلي المضارع رحلوه ماضي
والماضي كاتب حبكة الموضوع

*******************

أنا شفتني باغرق ومديت إيد
أخدتني_ ربي يعزها_ لبعيد
أنا خدتني في حضني وهديتني
وصفيت كأني لسة طفل وليد

**************

شرختني نظرة يتم في عينيها
يا ناس ياخلق الله مايكفيها
النظرة دي ولا ميت قصيدة شعر
النظرة دي لخصت للدنيا مٱسيها

**********************

دا يوم بعقد من الزمن مش يوم
مطر الأسى كان قبل منّه غيوم
قبله الهموم كانت صورومجاز
دي الوقت من غير جاز جحيمي هموم

******************

دي بنت باعت ورد للعشاق
وداشاب نفسه في بنت بس ان فاق
وردية تالتة الساعة كام دي الوقت
دخل النهار في عتمة الأنفاق

********************

دا وشّي شلته بحرفنة على جنب
كان تحت إيدك مستكين بلا ذنب
حسيت بتنميل وشّي قلت خلاص
راسي خلاص بقى جنب راس كان جنب ..

*********************

دا وشّي ناقص وشّي فين ودّوه
حاسس كأنّي للعدم مندوه
باصرخ في رَبع خراب ما ردّش جد
ووداني شاية رمال كلام حدفوه

****************

دي ليلة كسر في جبر كسر في جبر
إبن الزنا بقى شيخ\حاخام\بقى حبر
نفسي إيديا تكسّر الأصنام
مابقيتششايل (زمزمية صبر)

***************************

القصة مش قصة ولد عشقان
دار في الصحارى يسأل الرعيان
القصة قصة قلب راكب قطر
داخل غلط ومخلع القضبان

***************************

لمحك بتكتب شعر في عنيها
بلغ عنيها وشرطة النجدة
قبضت عليك يا صاحبي متلبس
بالحب في وضح النهار هيمان

*********************

محتاج ألاقي نفسي من تاني
فيكي واسامح حتى سجاني
ايه ينقص الإنسان سوى معناه
يتصالح الأول على التاني

********************

الحلم قبل مايتولد بيشيخ
نادوا عليك عيّل فضيلة الشيخ
تجاعيد\قلق\سراديب بوجدانك
م الأرض قاطع تذكرة\المرّيخ

*******************

يا شعر بطل زن على ودني
أنا ما خطبتك من أبوك سيبني
رجعني شجرة ف بيت/قناية في غيط
وبلاش أمانة عليك تغلبني

*********************

كان حلم ليلة صيف قلب ل كابوس
واحد جريح والناس عليه بتدوس
ومجرجرينه بحبل من رجليه
ومطلعينه المشنقة بلبوص

*******************

مستوعب التركة اللي شلتيها
وبكام عذاب دافعة تمن فيها
ومقدر ان انتي جميلة بجد
بس اني ابقى الجاني( عدّيها

*******************

ماتقليش الشيلة بالأسئلة
الحب أجمل صمت مش أسئلة
الحب ضربة فاس في راس محتل
الحب عقدة ترفض الحلحلة

**********************

ماتفسريش في وشي كوابيسك
أنا مش ملاك ولا كنت إبليسك
أنا حد عدا في الطريق شافك
قال لك كلام ولحقت أوتوبيسك

**********************

ياعيون تمطر كل يوم أسرار
عابر سبيل في بلاد بلا أسوار
سارق من الزمن الضنين الأمل
فرحة حرام في ٱخر المشوار

*****************

في القلب ( مصل الغربة) محبوبة
تهجر ماتهجر عشق من غير توبة
علمتها الأسماء وقلت اسجدوا.
…صورتها في القلب محبوبة

************************************

كانت بتشرب شاي كأنه العشا
كانت بتحمد ربنا ع الستر
كانت بتضحك ضحكة من قلبها
تتفك مليون سطر في رواية

**************

الصبح بدري اتاوب البرسيم
أعلن وجوده في الزاروق الريم
والبط عامل دوشة في الترعة
والشيخ محمد نادى مجدي فهيم

*****************

دايرة السواقي تطلع المية
نعسانة طية بتنفرد طية
تصلب في عودها وتنطلق ع الغيط
( والقمح واهب عيش وأغنية..

***********************

أنا باسألك من كام رغيف مسروق
من كام فقير م السوق رجع ما شراش
كان قالوا مابينساش وقالوا ما نامش
من غير عشا نام ألف ليلة جعان..

***************

أنا باسألك من كام سنة عطشان
للطبطبة على قلبك الحزنان
من كام سنة لمجرد التصريح
إنك صحيح واحد صحيح إنسان

***********************

أنا من هنا ولحد ٱخر شوط
في السعي مش زعلان ومش مبسوط
بألضم في حبات عمري وادعي لي
أجمع في عقد الأجوبة المفروط…

************************

أنا مش مع ولا ضد عندي عيال
راح أموت واسيبهم يكتبوا الموال
ممكن أكون مش أب حسب الطلب
ربك كريم عوضني أحلى عيال.

***********************

باتذكرك سمرا سمار النيل
روحك ترفرف صوصوة وهديل
ياامهوإيديكي حضن فيه إيدي
راجعة أشد أرق م المواويل…

******************

( أهلك لا تهلك) قالها شيخ سيد
سيد حجاب الطيب السيد
مااعرفش ليه داخل غمامة بكا
ومشبكة الأبنودي بالسيد…

********************

هل من طريقة ترد فيا الروح
وابدأ من الأول كتاب مفتوح
أبيض بلا سقطات بلا أسئلة
مش معضلة دي سكة عايزةوضوخ..

************************

والله شايف نفسي وعيوبها
وكتير بارقع بالأمل توبها
الضعف خالق رد فعل عنيف
بيشدني لرصيف جمع طوبها…

*******************************************

قلبي على الأسفلت دا المرمي
سألوه عن اسمي قال هواها اسمي
خايف بتحقيق النيابة يقر
ع المستقر القاتل المحمي…

***********************************

باشربها سادة ماتشتريش سكر
لو كان لابد فضحكتك سكر
مشتاق أضمك واملك الملكوت
واحيا واموت كام مرة واتبعتر….

************************

دي الوقت لو سمحت ظروفك موت
حايقولوا كان طيب لذيذ وكيوت
الشعر مش نبوت في إيد غنام
ولا كان صدام يتفض بالنبوت….

**********************
**********************************

ياجراح بتضرب كل يوم مواعيد
قلبي صبح مسرح عبث ووعيد
من كتر ما باحكي الأسى وباعيد
شعري اختصرته في نواح وعديد

********************

دي فجأة باضت ف القفص كتكوت
دي جالها طلق ولادة من غير صوت
دا مجتهد أنشأ عدم من عدم
واعطانا حق الإنتحار والموت

********************************************************************************

الخوف زارع لي ف كل حتّه هموم
شبه الخريف وغيومه وشّي غيوم
لسعة أسى سكرانه بيها الروح
وكأنّي لابس جنّي لمّا بأقوم

*****************************

من يومها طالع قلبي سقالة
مابتنتهيش غير ف السما السابعة
يابسمتي الدامعة يا شيّالة
أنا روحي طالعة فيكي يا الدمعة

****************************

ورا كل ضحكة طالعة تل أنين
ورا كل آهة بيندفن عاشقين
بنرقصك يا حزن ونشوطها
الضحكة دي بدل العياط ف الجون

*********************************************

البحر عامل دوشة ع الشباك
وانتم هنا والقلب لسه هناك
سمكة صادتها شباك محبتكم
أنا ليا مين غيركم هنا وهناك

*******************************************************

تكبر ويكبرحبها يضنيك
هند اللي مهما تفكك تفكيك
ساكناك ومالكة القلب شرق وغرب
المستبدة هند دون شريك…

*****************************************************************

الأسئلة حبلانة بالأسئلة
والشوك مطرز معضلة معضلة
نفسك لظى تنهيدة وسط النار
يا قبضة استعمار ضلوعي(الخلا)..

**********************************************

دي روحي أو بالأحرى أخت الروح
ويايا خطوة بخطوة فين ماباروح
جوايا سنتي بسنتي ساكناني
أهرب لفين ألقاها جوة الروح

****************************************************

في البدء لازم اقول لها ( مرسيه)
قلبي بقى إنسان وسرها فيه
شفت اللي ماشفتوش في عشق بجد
وصفيت سميت عديت صحاري التيه..

*************************************************

والله بابكي زي طفل يتيم
باشربأساياحسرة( شرب الهيم)
باتذكرك واتصورك مرسى
ياطول أسى المشتاق لقلب سليم.

*********************************

في الصورة دي قلبي سحابة شتا
متكتفة م البرد متكلفته
قلبي اللي داخل عامه بعد الألف
لساه فتى أشواقه بنت الفتى

**************************************

أنا لما قلت باحبك اتوضيت
لبيت وطفت سعيت وزرت البيت
أنا لما قلت باحبك اتعلقت
روحك بروحك في السماحواديت

*************

يومها كأنك يومها دي الوقتي
وقف الزمان عندك وقف وقتي
الناس تلاشوا وصرتي إنتي الناس
وسألت مين راح فين؟ تبسمتي

*********************

ياجنون ياناس ياجراح يا شط بعيد
قلبي ماهوش في ضلوعي لص عنيد
سرقه سرق من بالي عناوينكم
وسايب لي مطرح إيد سلام في الإيد

************************************************************

فايتة جراحي فيا سنتي بسنتي
باهرب لبرة من تسلط صمتي
لو فيه علاج للسهد والحيرة
أنا كنت أهرب من رحى حيرتي

***************************

الحزن غارز منجله براسي
فوضى تقابل فوضى إحساسي
رديني عيل راسه( ع الزيرو)
قلبه خبيز صابح في إيد ناسي

**********************

في القلب ناصب أكمنة للحب
يمكن كيوسف أترفع م الجب
يمكن كيونس برّة بطن الحوت
أنجو سليم الروح سليم القلب

************************

في الليل قلوبنا بتخترع سلوى
وتقول هنا نشوى هناك نجوى
وتعدّي من عاشر كمين منصوب
والسلك شاجب توب بميت بلوى

************************

حبّة رضا من نبعك الصافي
لمسة حنان من حضنك الدافي
قلبي قدم حافي بجسد حافي
ياروح بقت مش عارفة فين هيّه

*********************

خايف أعدّي النيل وما اتبلّش
ماشي في شراقي جلدها منمّش
لامس كفوف الفلق متر في متر
والخلق داخلة وخارجة تتكرمش

**********************

الجرح نبّت مطرحه مجاريح
وانا وانتي في الطرقات مهب الريح
حبّة هطل يا قلبي ع النوتة
ياناس يا وجع القلب يا تجريح

**********************

ماهو مش حقيقي كلي شر في شر
أنا عندي برضه حاجات بعيد الشر
تنفع تكون حسنات \عمل معروف
تنفع تزيد على قنطارين الشر

************************

بيبص لك في مزاجك المعدول
بيبص لك في شقتين الفول
ممكن كمان يفرض رسوم ع الهوا
وجهاز لضبط النبض ضبط القول

************************

أنا باسألك من كام سنة عطشان
للطبطبة على قلبك الحزنان
من كام سنة لمجرد التصريح\
إنك صحيح واحد صحيح إنسان

********************

ماتقلقيش القلب تحت الرادار
من كل زاوية أسئلة وحصار
وانتي اللي كنتي كل شيء عندي
داخلة بنفس الرسمة دون ابتكار

**********************

أنا غالبا صاحبي رفيق الدرب
وانا غالبا زادي برحلة حرب
أوقات اشكل ع الورق محبوب
واتوضى وانوي فيه صلاة الحب

********************

فيه ناس كأنها موت بطيء عشري
بتقلبك في الدقة في الكشري
وتلف لك طبقين وتضحك: كل
تأكل وتحبس بالردى البشري.

******************

الموت كتير مابقاش يخوفني
كم مرة جاني بنفسه عرفني
وترك لي عنوانه ورقم الواتس
واداني ألف ميعاد وشرفني

*******************

ماانتاش واحشني بجد ولامشتاق
ولاورد قلبي بتحرقه الأشواق
قلبي اللي كان طيب صبح مفتري
قاسي عديم الرحمة لااستثناء

**************************************

ماتقلقيش القلب تحت الرادار
من كل زاوية أسئلة وحصار
وانتي اللي كنتي كل شيء عندي
داخلة بنفس الرسمة دون ابتكار

***********************

بيبص لك في مزاجك المعدول
بيبص لك في شقتين الفول
ممكن كمان يفرض رسوم ع الهوا
وجهاز لضبط النبض ضبط القول

*****************************

في البدء لازم اقول لها مرسيه
قلبي بقى إنسان وسرها فيه
شفت اللي ماشفتوش في عشق بجد
وصفيت سميت عدّيت صحاري التيه

*****************************

واللهِ كانت قصّة مش بطّالة
قادت شموع وموع بحسب الحالة
لو ساعة نضحك نكتئب كام يوم
وقلوبنا طالعة ونازلة على نقّالة

***********************

هل لو خرجنا من السبق بلابيص
هل يعني ممكن ننجو م البعابيص
الدنيا كانت ملك كل الناس
من غير قانون يمنع خروج الجيص

***********************

أنا عشت خمسين حول با عبّي الهوا
واوصف لعاشق بخته مال الدوا
وف لحظة قلبي فيها داق الحب
جمع الطابور قلبي وأهل الهوى
*****************

أنا كنت جيش قدام عصا زيفكم
نسماتي هبت لطفت صيفكم
دي الوقت خايف أموت تحاسبوني
ع الموت هنا وهناك على كيفكم

************
مجروح شايفني كأني مشهد فيلم
باكتبني زي مااكون باسجل حلم
باخرج بعيد والقطني بالكاميرا
وارجع تدوسني جراحي ٱخر الفيلم

************
·
ياعنيها تغسل م الهموم قنطار
منها إليها بابتدي المشوار
في ضلوعي أرض عمار بحسن بديع
تهمة شروع في العشق باستمرار

******************
أعصابي ركبت بعض ركبتني
ودراعي راكب راسه وفايتني
أعدل رقبتي تتقطع فرافيت
يابكره طل إن شالله ترفتني
******************

أنا من زمان خايف من اليوم دا
يجيبوا لي عند القبر كام وردة
وأموت وحيد حواليا عفاريتي
من غير مايسأل حد في الواد دا.

*****************
الصبح خارج من كمام الليل
بيحني كف الرزق بالتساهيل
وانا من عنيكي لحد شط أمان
أبحرت مائي ومركبي المواويل

*****************
عن راسي باسأل مين لمح راسي
راسي بعيد عن بحركم راسي
الغيبة طالت ماشي من غير راس
ومبعترين في الصحرا إحساسي

*****************٪
عن عام زيادة اتقفّل التموين
حصة جهنم داخل التموين
مين اللي راجع مين يمدد لي
عقد العذاب ياخلق مين قال مين

****************
داعش بتلعب سيجا ويا الروس
أمريكا تضرب ف الأسد والروس
والمشهد السوري اتقلب دومونو
سوريا بقت مسرح لنهش السوس
**************

أنا كنت (واخد بالي) سبت البال
كل الكلام بيعدي م الغربال
إحكي كمان إحكي مانيش سامع
الكدب خلف م الحقيقة عيال
********

غمضت عيني شفت جد الجد
_ مالا تراه العين_ بعين الوجد
الناس كتاب مفتوح بلا كنايات
_ لولا شوية حزن_ شبه الورد
*******

غير بعد جهد لقيته ف الأمعاء
واكل حقوق ومبدل الأسماء
المستقيم دورت مالقيتهوش
غير في كتاب الهندسة مستاء
********

أنا مش حاغير مفرداتي عشان
سرقوا كلامي وغيروا الألوان
أنا شعري شكلي فيه چينات دمي
-مهما اللصوص سرقوني- له عنوان
********
الدنيا مش مستاهلة هذا الزحام
هذا اسمه ايه الضرب تحت الحزام
خليني احبك زي ما باحبك
من غير مانسأل بعض فاضل كام
**********
لو نص هذا الحب حبيته
لجبل أحد كان غصب عنه اتهد
أنا يااللي قلبي اتهد هديته
بمسكنات الدنيا لم يرتد
*******
سنتين بارقع جلدي لاسة وتوب
واكتب كتاب الصبر ع المكتوب
أنا يااللي كنت كتبت للخروب
بقى فاضي حتى ملانه نص الكوب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: