جريدة العربى اليوم الاخبارية
إِمسَح دموعك يا ولَد
الميلاد مفروض
و زيه فراق
و إتفرّض
كون صَمَد
إفرِض هأمِد في عُمرك
ألف عام
و اسرد بين ايديك الحِكاية
و ادبحلك كُل يوم
كُل يوم جوزين حمام
و يخلص الحمام اللي طاير
و تنام
و انت لسه جواك كلام
يا ترى واصل ل بُكره
و لا بكره فكرة تايهة
و سط افواج الزحام ؟
و الزِحام زِحام يا صاحبي
و اللِجام محبوك لِجام
افرض
هأجيبلك ميت سند
و مُنشدين
اللي مفرود ع المقام
و اللي واخداه ندهة مدد
و اللي اتطوّح مِ التعب
و للخلا ضهره اتسند
إفرض
هتبقى موش بس واحد
وتمشي زيي
متلخبط في العدد
فاكرني موش خايف ؟
ده أنا مرعوب في جِلدي
و كل ما يعدي حد
و اشوف الطريق
و إني بأعدي
بأخبي عيني م الطريق
و اقعد أطبطب عَ اللي مني
يا نفسي إهدي
إفرض
انك مشيت
هيحصل ايه ؟!
و لا شئ جديد
الكون بحاله
ماشي في طوابير النشيد
ينسى … يردد
يصحى , يعيد
ان كنت فاكر إنك
مخلوق كمالة
اسمحلي اقولك
ده كلام عوالة
دا اللي سابحين في العبث
و اللي لاضمين دمهم
في ضي حكمة قوالة
كلهم يلتقوا لحظة جلالة
ده كُل شئ
ناظمه سيدك
نظام يلين بس حديد
ما في حاجة
تُخرُج عَ النظام
حتى اللي قالت :
هل من مزيد
حتى المزيد
ما حاجة زادت
عن ميزان
و الكفة قيد !!!
