جريدة العربى اليوم الاخبارية
لكى تحلل شيء لابد أن تستند للمعلومات..
التحليل خطوة لاحقة على المعلومات وليس العكس..
قبل المعلومات بتبقى “تكهنات” مش تحليل
و عشان تحلل شيء النهاردة لازم تبص له بشكل شامل.. بشكل استراتيجي و تربطه بأحداث الدنيا كلها حولك.. مين كان يصدق زمان إن حدث في مصر.. ممكن يوقع بورصة نيويورك؟
ولكن هذا هو الواقع الآن ! ..
سيبك من التخلف بتاع “دا أصل العواجيز هم اللي صوتوا”.. دا كلام أهبل من شخص مش لاقي حد يقوله.. و لا فاهم بيقول ايه.. و عايز يتكلم و خلاص.. لو اتناقشت مع عصاية مكنسة يبقي أشرف لك من إنك تفهمه و للا تناقشه.. اللي دعا للإنفصال اصلا كان شباب الجامعة البريطاني..
إنفصال إنجلترا عن الإتحاد الأوروبي من الأحداث دي.. حدث استراتيجي.. و الموضوع فيه أكبر من الشماتة في سياسي متواضع جدا زي ديفيد كاميرون..
هو ليه كاميرون استقال؟ كاميرون إستقال لأن نتيجة الإستفتاء جاءت ضد توجهاته و توجهات حزبه.. و حاتفتح أبواب هم مش عايزينها.. مش عشان الإنفصال “ضد إنجلترا”.. هم مش وطنيين أوي لا سمح الله.. هم أصلا كانوا بيشتغلوا ضد إنجلترا منذ البداية.. اتفرج علي المظاهرات اللي رافعة علم داعش في شوارع لندن.. اتفرج علي أكبر معقل للمجرمين الهاربين في العالم.. عشان مش موقعة على تبادل المجرمين مع نص دول العالم.. تلاقيه في لندن.. اتفرج علي أكبر تجمع للإرهابيين تلاقيه في لندن..
الوضع القائم النهاردة محتمل يؤدي لانفصال ايرلندا و أسكتلندا عن بريطانيا.. لأن دي دول معتمدة علي الإتحاد الأوروبي إقتصاديا.. و من غير الإتحاد حاينهكوا جدا و ممكن ينهاروا..
بموجب اتفاقية لشبونة الموقعة بين دول الإتحاد الاوروبي.. مادة 42 بند 2، فإن أي دولة في الاتحاد بتتعرض لاعتداء، تلتزم باقي الدول بمساعدتها بشتي الطرق و كل السبل المتاحة…
النهاردة إنجلترا خرجت من نطاق الحماية دي..بس هي مش محتاجاها أصلا.. لأنها لازالت عضو في حلف الناتو.. كمان في اتفاقية بين الولايات المتحدة و إنجلترا من سنة 1958 اسمها ” اتفاقية الدفاع المشترك 1958 US–UK Mutual Defence Agreement”.. بتتكلم عن تعاون استخباراتي نووي…
الإنفصال سيؤدي لتضخم في إنجلترا.. التضخم سيؤدي لزيادة سعر الفايدة.. و دا حايخلي الناس تسعى لأنها تودع في البنوك الإنجليزية عشان بتدفع فايدة أكبر.. الإقتراض حايقل و الاستهلاك يتظبط…
الإنفصال يعني إن إنجلترا مش ملتزمة حاليا بأنها تاخد لاجئين لو الإتحاد الأوروبي قرر دا.. و مش ملتزمة بقرارات التدخل أو عدم التدخل في سوريا.. و مش ملتزمةبعدم تسليح الجيش الليبي
الإنفصال “ممكن” يخفف الضغط علي روسيا.. وروسيا حليف استراتيجي حيوي للغاية بالنسبة لنا.. لأن دلوقتي انجلترا مش ملتزمة بقرارات الإتحاد الأوروبي في العقوبات الروسية بسبب موضوع القرم.. يعني تقدر روسيا تتاجر تاني و الشركات الإنجليزية تستورد محاصيل و بضائع روسية..
لما روسيا تقف و تشم نفسها شوية الدولار يتذبذب.. أمريكا رافعة سعر الدولار عالميا بالذات عشان توقع الروبل.. و عشان تحقق دا دعمت إن الإتحاد الأوربي يفرض عقوبات على الإتحاد الروسي.. النهاردة في دولة كبرى مش حاتطبق العقوبات دي..
الأهم إن روسيا تقدر عن طريق إنجلترا “تعيد البيع”.. لو باعت قمح لشركة في لندن.. الشركة دي ممكن تبيعه مثلا لألمانيا.. لأن البائع خلاص مبقاش “روسيا”.. بقت إنجلترا…
الجنيه الإسترليني “عملة صعبة Hard currency”.. يعني في ابسط تعريف.. مش بتنهار بسهولة.. بس دا حيأثر بشدة عل السياحة هناك.. و حايكون في بدائل.. منها السياحة في روسيا.. و منها التعامل مع روسيا…
يعني إنجلترا بقت نافذة لروسيا على باقي دول الإتحاد تشم منها نفسها تجاريا و إقتصاديا…
عشان تعدي لانجلترا من روسيا اقرب طريق لك من المانيا.. دا يخلي ألمانيا تخفف العقوبات الروسية عشان تنال جانب من تفاحة التجارة دي؟ يمكن..
إنجلترا “كاميرون” كانت بتبيع طائرات “تايفون Typhoon Jets” لدول البلطيق عشان تحمي نفسها من روسيا.. يا ترى دا حايستمر؟ حايتوقف؟ محدش عارف…
إنجلترا نفسها حتتأثر؟ الولايات المتحدة حتتأثر؟ أيوه.. بس محدش عارف لأي مدي و لا إزاي حاليا.. و اللي يقول كده أحمق متعالم.. بيبقي في دايما في الأحداث اللي من النوع دا “فترة شك و توفيق أوضاع period of uncertainty and adjustment.”.. و دي محدش عارف حايحصل فيها ايه.. تحصل ثورة في انجلترا؟ ممكن.. تنهار؟ جايز.. تبقي أقوى من الأول؟ احتمال…
بس فترة الشك دي دايما بيبقي فيها خلل اقتصادي و أزمة.. و دا اللي مخلي أيتام الإخوان الإرهابية و أرامل منظمات المجتمع المدني يعيطوا بالدموع.. التمويل حايقف.. أو علي أحسن الأحوال.. حاينخفض لدرجة إنه يبقى لا يذكر…
الإنفصال حايخفف الضغط علي مصر و سوريا من حيث تمويل الإرهابيين و الخونة..
في دول تانية حاتخرج؟ يمكن.. في دول تدخل؟ احتمال.. ممكن انجلترا تنشيء حلف مستقل مع الولايات؟ ربما…
الخبراء بتدرس لسه و بتشوف التأثير دا على كافة الاصعدة حايبقي إزاي..
متستغربش لو لقيتنا بنتعامل مع إنجلترا مثلا في سلاح.. و سيبك من عبط “مش دول بيدعموا الإخوان”.. لأن السياسة أكبر من كده.. بتتكلم مصالح و بس..
الشطارة هو إننا مش نشمت.. لأ..
إننا نشوف نقدر نستفيد إزاي من الوضع دا..
خلينا نشوف حايحصل ايه بكرة..
