جريدة العربى اليوم الاخبارية
مزاد علني
بقي عندي
اكتفاء ذاتي من الاحزان
وفاض عني عشان إني
ماليش ف الدنيا دي عنوان
بقيت مدمن دموع عيني
ولو جفت
باحس اني كما الخرمان
والملم نبضة والتانية
وأحسب إيه باقي لي من عمري وبالثانية
وأكتب همسة ع الشفة تكون شاردة
تروي الصبر ف سطور باردة
يا أحلامي في جوايا ف طول عمري
تقف عندي معكوسة ومعاندة
وحتي الأمل ف ورودي صبح صبار
بطعم المر كما الحنضل كما العلقم
مفيش باقي عشان تندم
ولو تعلم بمكتوبك
ولون الشمس ف غروبك
شعاع الفجر ومعاندك
عشق عتمتك ليلك
سكنت غربتك ويلك
عطش نيلك جفاف جواك
طبيب عاجز يكشف المستور
شعاع النور ضباب وسراب
يادمعة بتدمي م الأحباب وتجرحني
تقطعني ف كل رصيف
خطاوي الأمل شرقانة للتوصيف
وجنة أبوابها مقفولة
وتفسيرها كمان تخاريف
يادنيا أفتحي لي بابك ولو لحظة
وانا شايل ملفاتك أكيد تكليف
ياريت تكتمي عندك ولو مرة
وأحس الفرحة ف عيوني
ولو تخاطيف. ……..
