كتاب وشعراء

ولاده القط داعش …..قصه قصيره بقلم محسن (زغلول سليم )

ياساده ياكرام . في سائر الدهر والأوان والزمان ومع مرور الأيام .

وإذ فجأه ألاقي الشملوله ( مراتي) فتحت باب الشقه وجايبه معاها ضيفه . وإذ هي بقطه صغيره ( نتايه أنثي ) لونها ابيض في أصفر .

وأنا أساسا بأخاف من القطط لأن لها ذكريات زفت معاي .

المهم المدام وبنتي الصغيره أقنعوني أخليها في الشقه . وأطلقو عليها الإسم التقليدي للقطط ( بوسي )  إنتو عارفين بقي شيطان الستات المقنع .

وسبب عقدتي من القطط هو كالأتي :-

 في يوم من الأيام أنا وصغير كنت نائما وصحيت مذعور علي صريخي أنا ومعرفشي فيه إيه ؟ إلا بعد ماربنا سهل .

طلع أنا ونايم تخمنت معاي في البطانيه القطه بنت الكلب وأنا بتقلب أنا ونايم رحت نمت عليها وعايزه هي تلاقي مخرج علشان تطلع فلقيت الدنيا مقفله في وشها ومفيش غير منفس واحد . قوم علشان تطلع عضتني في حته مايعلم بيها إلا ربنا . إشتغلت أصرخ لغايه ما لقيت نفسي وسط أهلي بس مش فاكر هم إللي جولي ولا أنا إللي رحتلهم. لأن لما فوقت لقيت نفسي مش في مكاني . ده كويس وكرم من عند ربنا إنني مش نايم في البلكونه ولا علي شاطئ ولا في شارع . كنت زماني في ستين في سبعين.  والمرحومه أمي ترش ميه بملح عليا ويكبرولي في ودني وعملولي طاسه الخضه (الخلعه)هم فكروني كنت بحلم . بس لما شافو مكان العضه. فطسو علي نفسهم من الضحك. أنا بس حسيت  دي هي أم القط داعش إللي لسه ححكيلكم حكايته بعدين .

صحبتنا  . عامله نفسها مارلين مونرو القطط .

بعد مده لقيت واحد من ولادي داخل وفي إيده حبل .

أنا خطر في بالي الواد ساحبله خروف ولا معزه ولا كلب علي أقل تقدير . إنتو عارفين شيطنه الأطفال في سن معينه .

ببص في نهايه الحبل . لقيت قط شكله غريب شويه. شكله إسود وشعره علي عنيه .

وضقرم في الأرض .

إللي يجنن القط مربوط بالحبل وماشي معاه إذاي معرفشي؟ لأن مفيش قط بيتربط بحبل وتعرف تمشيه علي مزاجك .

بس ده شكله كده متعلم تعليم عالي .

قلتله ياما جاب الغراب لأمه ( وأبوه )وعلشان قاعد أنا قلتله ( وأبوه) . إيه دا كمان ؟

قالي يابابا ده قط أجنبي .

قلتله أجنبي . مفيش فايده عقده الخواجه مستحوزه حتي علي عقول الأطفال .

قلتله هي ناقصه ؟ مش لما  نكفي البلدي .

قلتله جيب من الأخر . وأنا مكملا كلامي معه

قعاد مش حيقعد في البيت . مش ناقص بهايم . حوكلكم ولا حوكل البهايم دي .

الواد إبن الكلب متعرفش إذاي أقنعني أخليه في الشقه .

خلاه يعمل شويه حاجات وأنا مرعوب من شكل أمه . شكل القط وشعره عامل زي عيال اليومين دول السيس بالخنافس والحركات والأفشاخانات المعروفه دي .

إبني راح رماه علي . قمت فاطط وناطط وزعقتله. لأنه عارف قصتي مع القطط .

راح إعتذرلي وقالي يابابا ده مش بيعض وهادي خالص .

قلتله برضو هو فيه قط كده . ده شكله كده يهودي الأصل أو تربيه يهود من الأخر . لإنه شكله بيتمسكن لحد ما يتمكن .

قالي يابابا حنخليه كام يوم علشان يجيب ولده وعيال من القطه بوسي . وحمشيه بعد كده لصاحبه .

أتاري طعام وأكل إبن اليهوديه ده مش زي طعام وأكل البهيمه بنت البهيمه القطه (بوسي ) المصريه الأصل والجذور .

طلع ليه أكل معين وبيشتروه من السوبر ماركت. وولدي قالي لو أكل من أكل قططنا العادي ممكن يموت والقط بتاع صاحبي وحرجعهوله بعد ما يقضي مهمته  .

قلت وقعت أمه زي الطين هو والواد كمان . مسكت الواد قلتله وحياه أمك حتأكله من مصاريفك .

قالي ماشي موافق يابابا .

جيت في يوم من الأيام . لقيت الأكل خلص . قلت في نفسي ( أنا حقعد قبال الواد مش حخلص ) قلت أطفح القط إبن الهبله ده أي أكل من الأكل إللي بتاكله بهايمنا القطط.

رميتله أكل القطط بهايمنا .

وعنيكم ماتشوف إلا النور . شويه وكنت حطلبله الأسعاف . ودعك وبهدل أم الصاله وكان ساعات مايعلم بيها إلا ربنا .

طبعا أنا شلت هم أن القط بتاع صاحب إبني وحندخل في متاهه معاه .

المهم بعد مافضي إللي إطفحه في معدته لقيته رييح خالص وسخسخ وشكله كده نام تقريبا . وكل شويه أضربه علي رأسه أشوفه ليكون مات ولا طين إيه.

ألاقيه بيتحرك وبيأن من بوقه .

قلت عايش عايش . الحمد لله .

وشويتين جوم الشماليل ( أسرتي ولادي ) بتوعي وشافو إللي متمطع ده إللي علي الأرض وقالو بووووو مات مات .

مات .

 قلتلهم لااااا ماماتش لسه فال الله ولافالكم . متنيل علي عين أمه عايش . بس مقيل حبتين . لأن الأكله كانت دسمه شويه . وأنتو عارفين أكل مطعم أم هاشم .

طبعا العيال وأمهم مخلوليش علي العود ملف . ذلوني في الكلام قلنالك لو أكل أكل قططنا ممكن يموت .

قلتلهم . أهو قدامكم قاعد ذي الجن . هو بس بياخد إستراحه وحيقوم يكمل . هو إستطعم دلوقتي . بس من كتر حلاوه أكل أم هاشم إتصدم شويه .

ولدي حبيبي سمع كلمه حيقوم يكمل .

( قالك ياعم أخد القط أعالجه وأرجعه لصاحبه أحسن أبويا كده شكله ناوي عليه.)

المهم إبني راح جاب قفص شيك وحط الشملول فيه وقايم بيه وخارج من الباب

قلتله إستني ورحت باصص علي القط في القفص وقلتله ( ياسمك إيه ؟ أنا مستنيك علشان تكمل باقي الأكل .

ولدي خد القفص ويافكيك من الباب .

وباقي ولادي وأمهم شغالين تنضيف طبعا بعد الحادثه الأليمه . وزعلو علي القط .

أتاري الواد إبني أخد القط ووداه للمستشفي ( بروك )

إتصل بأمه بيقولها أنا في المستشفي وخلي أبويا يدي مبلغ (50) خمسين جنيه لصاحبي إللي حبعتهوله دلوقتي . علشان يجيب الدوا للقط .

قلتلها مستشفي . ياعيني . شوف الواد .

قلتلها ده لو واحد فينا إتكوم مش حيعمل كده إبن الكلب .

وإديت المبلغ لصاحبه .

وقلت لصاحبه قول لولدي لما يطلع القط من المستشفي . شوف عنوانه علشان أزوره ب2 كيلو برتقان . صاحبه قام ضحك ومشي وقالي حاضر ياعمي .

– نرجع لبذور محور قصتنا

طبعا القط الأجنبي الشملول شكله تخمن مع القطه بوسي وأدي مهمته إللي جايبينه علشانها لأن كان ليه فتره مرزوع . لأن طول الليل والنهار والقطه بوسي نايمه علي ضهرها .وده طبعا معناه إنها حامل . وشغاله تلف وتدور علي مكان جانبي هادي بعيد عن الأولاد علشان تجهز للولاده بتاعتها .

– وصل القط من المستشفي وأحضرإبني له العلاج . ولكن لم يحضر إبني القط الأجنبي الشملول مره أخري لمنزلنا . ولكن فضل أن يضعه في منزل صديق له حتي يخف ويعود مثل الأول ثم سيعطيه لصاحبه الأصلي مره أخري .

المهم تمر الأيام . وأقوم أغيظ إبني . وأقوله . إيه أخبار القط صاحبك .

يقوم يضحك ويقولي كويس . بس ياريت تنساه ومتسألش عليه . كنت حتموته وحيروح اونطه . وكنت حتجبلي الكلام مع صاحبه .

قعدت أضحك لما قلت يابس علي كلامه .

بعد كام يوم . القطه بوسي رايحه جايه قدامي ببطنها إللي منفوخه . وشغاله لحس وحنيه معاي وكإنها تتودد لي كي أقف معاها وأكون بجانبها أثناء ولادتها .

رحت مطبطب عليها وحنيت عليها بإيدي رايح جاي علي رأسها وضهرها. وأكلتها علشان تتطمئن .وفلتلها متخافيش أنا معاكي إنتي قدري ومكتوبلي . والله مراتي ماليش طوله بال معاها . كيف طولت بالي معاكي أنا . ده مراتي بتقولي كل شويه بتعايرني بيكي وتقولي إعتبرني بوسي بتقعد معاها كل الوقت ده .

شوفتي يابوسي مراتي بتغير منك إذاي !!!

جاتكم نيله إنتو الجوز .

طبعا القطه بوسي هي ميته في دباديب أمي وأكتر واحد في البيت بتحبه هو أنا .

لإني علمتها تاكل فين وتشرب فين وإزاي تعمل ببيه وإإإح في الحمام (الكابينه)وعلمتها الكتير . وحنيين معاها .

رحت محضرلها مكان في ركن في البيت علشان تتسخمط تولد فيه .

وشغاله الليل كله رايحه جايه . جايه رايحه . قلتلها مالك ياواكلا أمك قربت تولدي ولا إيه . حضرت ملايه قديمه وفرشتها علي الأرض . ورحت قمت أنام وكانت الدنيا ليل وجاتلي إتنونووو جنبي كتير . بس أنا مفهمتهاش لأن كان كابس علي النوم جامد ومسافه الصبح . أنا وبتقلب كده سمعت صوت سرنيك رفيع كده . قلت بس الهبله ولدت . بصيت علي الملايه إللي فرشتهالها علشان تتنيل تولد عليها لقيت مفيش . روحت أشوف الكوميدينو إللي مجهزهولها لقيته فاضي برضو . قلت أمشي ورا الصوت . لحد ما دخلت الحمام . طبعا علشان هي قطه نضيفه وعارفه أم الزعيق والشخط والنتر في البيت مع العيال علي النضافه عرفت ده.فقالت لنفسها إحترمي نفسك يابت وإولدي في الحمام بدل مايطير ورايا أنا والعيال. لقيتها قاعده تنضف في عيلها إللي لسه ولداه دلوقتي. خلصته هي من الخلاص وأكلت الخلاص بتاعه . طلع شكله أسود طينه . وشويتين إشتغلت تحزق وتطلق علشان تجيب باقي عيلتها ولادها وبناتها . المهم ولدت خمسه . قلت يا ساتر خمسه يخرب بيت أبوكي حوكلهملك إزاي دول بعد مايكبرو شويه . المهم لاعارفه ترضعهم ولا نيله . وهم شغالين نووونيووو لما صدعوني . بيدور علي الننه بتاعتهم يلف حواليها وفوقيها منهم إللي عرف وحد طريق ننته لقيت منهم تايهين مش عارفين حاجه رحت لابس جونتي بلاستيك وقعدت أمسك كل واحد فيهم في نيله أمه . بعد كده عرفو لوحدهم الطريق .

أمهم كل شويه لما أكون نايم تجيلي نيوووو  نيوووو . أقوم أصحي . أبصلها وأقولها خلاص المطعم شطب والمدام قفلت المطبخ ونضفت المواعين . صعبت علي وحطيتلها الموجود . وكلت وشربت وجات تشكرني بكام نووونيوووه حلوه . طبطبت عليها . وساعدتها وأخدت عيالها ودخلتهم بيتها إللي هو الكوميدينو المجهز ليها. وياعيني علي أم النضافه إللي عليها . شغاله لحس لحس في عيالها كل واحد شويه في جميع الإتجاهات وخاصه الورااا بتاع كل عيل من عيالها .

الكبير ده إسود طينه ذي أبوه الهيبز طلع طبعا ذكر . والباقين طلعوا نتي وشكلهم منهم مقارب جدا ليها أصفر في أبيض ومنهم لونه تحسه مخضر بأبيض في أسود  .

المهم الأسود ده من صغره جريمه. يكون في الكوميدينو وفجأه ألاقيه إجتاز ونط من جميع السدود والحواجز إللي حاططها علشان مايقعوش ويتعورو ويبعدو عن أمهم . الباقيين أقصاهم يخبطوا في الحواجز ويرجعو تاني . أما الأسود كل شويه يفط وينط ويوقع . ماكل أمه عايزله حرس خاص جنبه ينتبهله . ياخده ويرفعه .

وعلشان هي أول مره تولد . فمش عارفه تشيل عيلها . رحت ماسك الأم من رقبتها وشيلتها من فروتها ومشيت بيها كام متر علشان تتعلم . ورحت منزل واحد من عيالها في الأرض علشان أشوفها فهمت ولا حماره . طلعت فهمت الحمدلله . وشالته وودته لبيتها. بكده إطمنت عليها .

كام يوم علي كام إسبوع عيالها كبرو شويه . عيونهم فتحت وبدأوا بعد ياكلون ويشربون  لوحدهم .

– القطط الحلوين فتحت عيونهم وإشتغلوا في الهم المم .

وفي يوم كنت باكل وقلت أحط حته لحمه ليهم أشوفهم حيعملو إيه فيها. إشتغلو يشدو اللحمه حتي يأكلوها لكن معرفوش . وشاغلين شد فيها وبس . فجأه لقيت القط الأسود الشقي أخد حتي اللحمه لوحده وكل حد من خياته يقرب عليه يزووم ( غووووو )  عليه ويضرب بإيده علي الأرض .

لسه حقرب عليه علشان أقطعله اللحمه لحتت صغيره و راح هبشني بسنانه . وضرب إيدي بإيده . رحت شلتها بسرعه وسبته . لقيته مستميت ومقتول علشان ياكلها . ويجيبها من هنا لهنا لغايه ماقطعله حته وبدأ ياكلها . فجأه لقيته إشتغل يكح . الشملول أتاريه زور . وكانت حتطلع روحه . رحت شايله هيله بيله وإشتغلت ضرب علي عنقه لغايه مافطت حته اللحمه من زوره . راح بصصلي بصه مش هيه . يعني مش عاجبه إللي عملته معاه وضربته لكي أنقذه . وسبته علي الأرض . راح لنفس الحته ولسه حيحطها في بوقه إفتكرها . راح سابها بسرعه ومسك في الحته الباقيه . بس كان حريصا في أكلها وندغها وأكلها وهكذا باقيها.

خياته التانيين بياكلو بعد متقطعت ليهم اللحمه حتت صغيره .

بعد ماأكلو وشبعوا . دخلو الحمام (التواليت) لكي يشربو من الميه االموجوده علي الأرض. في حين أنا حاططلهم علبه صغيره فيها الميه . رحت جبتهم لكي يشربو منها . بدأو يلمسوا الميه إللي في العلبه وهم خايفين . كل واحد يشربله بوق ويشنق . فطسوني من الضحك . وبعدها عرفو طريقها لوحدهم وبدأو يشربو منها صح .

فيه قطه منهم نتايه مزاجها تروح ناحيه البلاعه بتستكشف إيه ده والصوت إللي طالع منها . وشويتين لقيتها نطت لقيتها جوه البلاعه. قلتلها يخربيتك إيه إللي عملتيه ده . بسرعه قلت ألحقها بسرعه . طلعتها وهي مبلوله وبتتنفض علي الأخر . رحت جبت قماشه ونشفتها من الميه . وسبتها طلعت تجري لأمها تحكيلها . لقيت أمها بوسي جايالي بتنونوووو وراحت ناحيه البلاعه.

قلتلها جات سليمه المره دي . بنتك شكلها كانت عايز تنتحر . بس لحقتها ياختي.

وشكلها بتك دي مش حتجيبها لبر .

دخلت أوضتي وقعدت أتفرج علي التلفزيون برنامج علي إحدي فضائياتنا . لقيته عك في عك . قعدت أقلب في القنوات التانيه. مفيش حاجه مفيده ذي كل يوم . إتفرجت علي فيلم أجنبي كان بيحكي عن الهنود الحمر .

المهم في تلك الأثناء لقيت أصوات القطط علي شويه . لقيت القط الأسود مطفح إخواته الدم . هات يالعب ونط وفط عليهم وعض ومبهدلهم . لدرجه قرم ودن واحده من خياته لغايه ماجابت دم وشغاله تصرخ.

ونحل شعر راس واحده تانيه منهم .

رحت حاطه علي المكتب . وقلت له ماتلعب بالراحه معاهم وشديت ودنه . راح سابني وجري ونط من فوق المكتب العالي ولأول مره . أنا إستعجبت منه بس عجبني لما نط بسرعه . شكله كده بيلعب تمارين رياضيه. لإنه مخافش ولاتردد لما نط .

جات أمهم وهم طلعو يجرو وراها وكل واحد بكلمته معاها ( نيوووو نيوووو نيوووو)

وهي شغاله لحس فيهم بتنضفهم وشغاله كمان هي نونيووووو ليهم .

وقعدت ترضعهم .

طفيت النور قلت علشان يهدو وينامو .

ورحت أنا كمان أنام بعد ماطفيت التلفزيون.

وبعد ماريحت علي سريري لقيت حاجه جنبي بتتشد . رحت مولع النور جنبي . لقيت القط الأسود متعلق في ملايه السرير ومتسلق وكان طالعلي علي السرير .

شلته وديته عند أمه .

ورحت أنام . بعد فتره . لقيت حاجه بتلعب في صوابع رجلي ذي حاجه بتعضني خلاني نطيت من علي السرير بسرعه . ولعت النور تاني لقيته هو إبن الكلب .

مسكته قلتله أعمل فيك إيه دلوقتي .ماتسيبني في حالي ورايا سفر الصبح وعايز ألحق أناملي ساعتين .

رزعته عند أمه وعنفته شويه .

المهم سابني الحمدلله ونمت شويه مش بطالين . وقمت ولبست وسافرت .

بعد ماجيت من السفر لقيت ريحه الأوضه نيله . راحت المدام رشت معطر فيها . أنا وبقلع هدومي لقيت تحت الشباك حاجه سوداء . مسكتها وياريتني مامسكتها .

أتاريها شخايخهم ولاد الجزمه .

رحت بسرعه غسلت إيدي من أم القرف والديتول والذي منه . لأاا وإيه الحته إللي مسكتها كانت كبيره وكانت طريه وطازه .

رحت جبت المسخوطه أمهم مسكتها وشممتها ريحه برافان عيالها . قامت بصتلي وسابتني وراحت تشمشم في وراا عيالها وهاتك يانضافه فيهم . قلت بت المركوب دي شغاله تنضف عيالها وهم يوسخو الأوضه .

المهم نضفت الأوضه بعد ما عرفت القصه.

قلت لاااا مابدهاش مسكت كل حمار منهم وأخدته علي الحمام أعلمه يتنيل فيه ذي ما علمت أمه . كلهم خايفين أنا وماسك كل واحد منهم . وكل ماأسيب واحد فيهم يطلع يجري فوريره علي أمه .

ولهذا قررت أن أتخذ قرارا صعبا لارجعه فيه. علي رغم إن أولادي حيزعلو جامد مني .

القرار هو مفيش قطط في البيت تقعد . الدنيا هاصت وماجت في البيت وولادي وبناتي معترضين وزعلانيين وإللي يبكي وكان يوم .

المهم بناتي حيتجننو عليهم . والولاد عايزين يقعدو القط الأسود المفتري ده .

لما لقيت كل البيت زعل والوضع بقي نكد في نكد .

رحت ناديت عليهم كلهم وعملنا مجلس عائلي مصغر .

قلتلهم فيه أنا علشان لقيتكم زعلتو كده . حنخف عدد القطط دي . يعني نشحت بعضهم . ونخلي بعضهم . ترددو في الأول . قلتلهم ولا أمشيهم كلهم .

قالولي خلاص يابابا . نخف عددهم .

قلتلهم من بكره حنشحت إتنين منهم .

حيتبقي تلاته . شوفو مين إللي حيتشحتو ومين إللي حيقعدو .

المهم الأولاد رسيو علي القط المفتري يقعد وأنا طبعا متغايظ من أمه . لإنه قارفني أنا ونايم . وحيقعدو إتنين تانيين أختاروهم بناتي . وإتففنا إن كل شويه يشوفوا الأوضه وينضفوها أول بأول ويعطروها. قالو ماشي يابابا .

جه اليوم التاني والحمد لله خلصت من إتنين منهم وعقبال الباقي ( طبعا ده أنا مع نفسي بقول كده ) علشان إللي في البيت مايزعلوش تاني .

وعدا كام يوم والدنيا ذي الفل . والأوضه نضيفه ومعطره والأوضاع تمام .

بس المشكله في الفطفطه بتاعه إبن المفتريه القط الأسود وبهدله إخواته والكوارث إللي بيعملها معاهم .

المهم جيت في يوم داخل الحمام في نص الليل. لقيت الميه علي الأرض كتيره ومغرقه  الدنيا . أتاري البلاعه مسدوده . قلت أسلكها جبت الشفاط طاخ طيخ في البلاعه مفيش فايده . قلت أنزل إيدي فيها أحسن يكون في حاجه سداها وعايزه تتسحب . لقيت كيس بلاستيك علي مرايه الحوض.رحت دخلت إيدي فيه وظبطه حتي لاتدخل فيه الميه وتوصل لإيدي.

نزلت إيدي لتحت في البلاعه . لقيت كده حاجه طريه . مسكت جزء منها وسرعان لقيت جسمي رجع لورااا بسرعه . ونترت من إيدي إللي كنت ماسكه .

تخيلوا طلع إيه ؟؟؟

طلعت القطه إللي وقعت قبل كده في البلاعه.

علي رغم من الخلعه ( الخضه) إللي أخدتها. لكنني كنت فرحان . إني خلصت من التالته.

قلت الحمد لله يامنت كريم يارب .

صحية ولادي الصبح ببدورو علي القطه إللي ضايعه . هههههه هههههه هههههه

قلتلهم البقيه في حياتكم . القطه إنتحرت .

رمت نفسها في البلاعه .

ولأن عارفهم مش حيصدقو كده . لأن عارفين إني مضايق من القطط . رحت حطيتها في كيس وورتهالهم . زعلو عليها طبعا . المهم راحت مع زباله البيت إللي كل يوم بنخلص منها .

المهم القط الأسود يوم عن يوم بيكبر وبقي حاجه صعبه خالص مالص.

أي ضيف بيجي تلاقيه يقوم ناطط في وشه. والضيف يقول بوووووو . وأخر إحراج .

أولادي أطلقوا عليه إسم ( داعش )لما يفعله من مغامرات وكوارث . قلتلهم معاكم حق تسموه كده .

وفي يوم كده كنت جعان علي الأخر وقلت لولادي حطولي أتغده . أنا كنت باكل وأنا قاعد علي كرسي وقدامي صينيه الأكل محطوطه علي كرسي أخر . جالي القط الحزون الفاقد (  داعش ) إشتغل ينونوو رحت رميتله أكل . وكملت أكلي وهو شغال ينونوو تاني ويشد في هدومي وأنا طنشته كتير . مش مستني أنا أخلص وأعطيله الأكل

المهم هو ملقيش فايده مني . لقيته مشي شويه لورا وأخد زاويه بحيث إني شايفه كله . وأنا باكل وببص علي طبق الأكل وإذ فجأه ألاقي حاجه نطت علي الصينيه ونزلت بيها علي الأرض بالأطباق بالطبيخ بكل الأكل . طبعا عجن الدنيا علي الأرض الطبيخ إتكب والرز والفراخ وغيره وغيره . وأصبحت في منظر درامي . مش عارف كده إزبهليت من إللي حصل . بس حطرشق من داعش الفقري ده. مسكت نفسي بالعافيه عليه . ناديت الولاد تعالوا بسرعه . جوم شافوا المنظر وقالو إيه ده . قلتلهم الشملول بتاعكو داعش أفندي . مرضيتش أديله أكل وطنشته شويه . راح ناطط علي الصينيه ونزلها بالأكل علي الأرض . الولاد ماتو من الضحك لما عرفو القصه . قلتلهم بتضحكو . إلحقوني حطولي أكل غيره بسرعه . ومش عايز أشوف وش أمه دلوقتي .

مشوه بعيد عني في الأوضه البعيده وقفلو عليه الباب وهو شغال نونيووووو وخبيط وزيح في الباب المقفول عليه .

وبعد ما خلصت أكلي حطوله يطفح ياكل .

وكل يوم عامل شقاوه . وكان حيتسبب في مشكله مع جيرانا .

طبعا ولادي كل شويه يابابا يابابا . وداعش طبعا معانا قاعد . سبحان الله . بيعمل حاجات غريبه . لما يعوزني ينادي علي ب (بأبأأووو بأبأأوووو ) من كتر سماعه لولادي حفظ كلمه بابا . بس طورها شويه .

فكل مايكون عايز يطلع من الشقه ييجيلي وينادي بأبأووو بأبأوووو أعرف إنه عايز يخرج (يطلع).أفتحله الباب يجري علي السلم

ياخدله ساعه ساعتين وييجي ينادي ويزيح في باب الشقه . أفتحله .

وشويتين ألاقي زعيق عند الجيران . سمعت سيره القط والباب إتفتح ونزلوه . فطلع الموضوع إن داعش عملها (شخ )قدام باب الجيران أكتر من مره . والناس زعلانه منينا . ومش بيكلمونا علشان داعش بيه أفندي .

فلقيت الدنيا حتتلخبط مع الجيران . فقلت مفيش غير الحل النهائي . وهو طرده من البيت . وحطيت الموضوع ده في دماغي .

بعد يومين . ماشي في الشقه . لقيت القطه أخته بتعرج . فقلت أكيد إتخبطت . فقلت أشيلها وأشوف مالها . فلقيتها رجلها مكسوره

وصعب أن تتعالج .وطلع السبب ؟؟ هو أن فوق السطح كان فيه واحد حبيبنا من الجيران مربي شويه فروج في عشه وكانو نفعينه لإن كل شويه كل يوم كانو بيبيضو له كام بيضه .

المعلم القط داعش وأخته أبو رجل مكسوره إتفقو مع بعض علي إقتحام العشه . والإنقصاض علي الفروج والبيض . وجوم بالليل في الضلمه طلعوا واحده واحده بعد ماعملو خطه لذلك . القط الأسود داعش لقي فتحه في العشه . إشتغل يوسع في الفتحه لغايه مابقت تدخل جسمه كله منها . ودخلوا هم الإتنيين حتتك بتتك عضعيض في الفروج وأكلوا كام فروجه علي كام ديك وكسرو بيض الراجل الجار .

وبعد كده هما وطالعين بيهربو جري بعد ماخلصو مهمتهم . فيه قالب طوب وقع علي أخت القط داعش من فوق العشه علي رجلها اليسري وكسرتها .

صاحب الفروج والبيض جالي زعلان . قالي برضو كده القطط بتاعتك تعمل كده في فروجي وبيضي . قلتله إحمد ربنا إللي جات علي كده وسابولك ديك وبيضتين . قلتله روح خد الديك إدبحه وأسلقه وإشرب ميته ومصمصه . والبيضتين أسلقهم وأضربهم بشويه رز علي عدس علشان تنسي إللي حصل . قالي ياعم روح بلا داعش بلا ماعش. وربيلك شويه فروج وبيض . ضحكتك وقولتله أديك إنت ربيت وتعبت يافالح وجات في الأخر شويه قطط ضيعولك إللي إنت عملته في سنيبن ضاع في ثواني . وأنا بشتري جاهز .

تعيش وتاخد غيرها . بس خليك مصحصح علطول وأمن عشه الفراخ إللي جيبالك الخير . ومتزعلش من إللي حصل. القط الأسود ده حيوان ويعمل أيه حاجه. ده بهدل الدنيا عندي في الشقه وطفش الضيوف من عندي وعملي فتن مع الجيران وفي الأخر جه علي عشتك. حتي أخته ماسلمتش منه . ربنا يخلصنا منه لأن قرفت منه ومن عمايله وعايز الدنيا تهدا ذي الأول.

أخت القط الأسود أصبحت عرجاء تمشي وتجري بيها ولكن بتزك جامد . حاولت علاجها بتثبيتها ولكن منفعش ولا حل سوي قطعها أو تركها علي هذا الحال . فتركتها تعرج وتعيش أيامها هكذا . وجعلت أولادي يتصرفو فيها ويشحتوها وبكده خلصت منها .

مسكت القط الأسود عنفته وزعقتله علي إللي عمله ولكن ولا هو في باله . شغال يتسكع في البيت ويتنطط ويجري وياكل ويشرب ويلعب وميعرفش إن كل إللي حواليه تعبو منه.

المهم القط الأسود أصبح وحيد مع أمه .

قلت لازم أوزعه. جبت شوال وداريته ورا ضهري وناديت حد من العيال . قلتله حمسك القط الأسود وإنت تفتحلي الشوال . وححطه فيه بسرعه وحقفلك الشوال وأربطه خفيف وتاخده هيله بيله ترميه في أي شارع بعيد من هنا أحسن يلف ويرجعلنا تاني.

القط الأسود مش ساهل حس إن فيه حاجه مش مظبوطه طلع يجري وينط من هنا لهنا وعلي الحيطان .

وبعد كام يوم مسكته وحطيته في الشوال. إشتغل يصرخ بصوت عالي من داخل الشوال

وقلت للواد إجري فوريره إرميه ولقحه في أي شارع بعيد عن هنا أحسن يجيلنا تاني.

والحمد لله لينا خمس شهور مرتاحين منه والدنيا هاديه . بس كل ليله أسمع صوت عالي جاي من الشوارع الجانبيه . قلت أكيد هو عامل مشاكل مع قطط الشوارع .

المشكله دلوقتي في أمه. هي أس المصايب كل شويه تحبل وتولد .

بس دلوقتي فرصه مش حبله علشان أغورها في ستين داهيه . وجهزت نفس الشوال .وعملت نفس الحركه وخلصت من أمهم .الله يخربيت أمهم . تعبوني لغايه ماخلصت أم القصه ديه .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى