? غربة نــــــــخلة?
يا نخلة بالله أمركْ حيّرْنــــــــــــــي
زادتْ هزْمتْني ادمُوعكْ بالتّغْــــــزارْ
يا نخلة بالله قُولي هنّينـــــــــــي
قلبي راهْ حْزينْ ماهوشي صبّــارْ
شُفتْ دْموعكْ سايْلا دمْعتْ عينـي
راني نتْرجّاك والمولى ستّـــــــــارْ
لوْنكْ راهْ اصفارْ ماهُو عاجبنـــــــي
ورّيني ما بيكْ يا مصباحْ الـــــــدّارْ
قالتلي احكي ابْهمّكْ خلّيــــــــنــي
منْ بعْدْ انْورّيكْ بيّا ماذا صــــــارْ
قلتلْها همّي صْعيبْ اوعيّانــــــــــي
غابُو عنّي احبابْ منْ كانُو فلْجـــارْ
ماعنْديشْ احبيبْ ضركا يعْنينـــي
لا صَديقْ انْحدْثو ناصحْ دَبّـــــــــــارْ
يا حسراه ارفاقتي غابُو عنّـــــــــــي
ونْساوْ العشْرا طْويلا ملّعْمــــــــــارْ
راني جيتْ احذاكْ انفاجي حزنــــي
حتّى ياتي خالقي لينا بَفْجـــــــارْ
قالتْ ضركا نْحدْثكْ يا سايلنــــــــي
تعْذرني لمّا نعوّد ذي لخْبــــــــــــارْ
يا خويا بالله ارحمْ وَ اعْتَقْنــــــــــي
شفّيتْ لْعدْيانْ أحبابي ولْجــــــــارْ
هاذْ لْبرْ صْحيحْ ماهُو عاجبْنــــــــــي
أصْلي فالصّحرا ما نبْغي لسْفــــــارْ
بَعّدتْ لَحبيبْ كانْ مْعاشرنــــــــــــي
اتْرَجّعْني ليهْ برْكا ملْ لَعْــــــــــذارْ
اسألتكْ بالله تقْصبْ رَجّعنـــــــــــي
هاذي أرضكْ باردا منْ شاوْ نْهـــــارْ
وترابكْ واحجارْ قاسي عذّبنــــــــــي
وفراقْ الأوطان قلبي يشعلْ نــــــــارْ
قلتلها أنا غرستكْ ونْوَنّـــــــــــــــــي
واجعلتكْ مابين صْنَوبرْ ولْعرعـــــار
قالتْ ياخويا أنْتَا متْهنّـــــــــــــــــي
أمركْ بينْ ايديك تفْعلْ ما تخْتـــــــارْ
متْحرّرْ منْ كلْ ضيقْ وتحزانــــــــي
وَنَايَا نْموتْ في ليلة ونْهــــــــــــــارْ
يا نخْلة كُفّي دْموعكْ يكفينــــــــي
احنايا لثْنينْ تقْدي فينا نـــــــــــــارْ
كلْ آخرْ بمْحاينو راهْ ايعانــــــــــــي
واحدْ دمعو فاضحو،واحد صبّــــــارْ
هاذي خلقْ اللهْ كاملْ تْعانــــــــــــي
مادامتْ شدّا مادامتْ اضـــــــــرارْ
كلّمتكْ بالله هُوّا سلْطانــــــــــــي
الله ربي خالْقي هوّا الستّــــــــارْ
بقلم ?الشاعر محمد السبتي?
