الجمعة , أغسطس 6 2021

مها الكاشف تكتب …..انا بحبها اه بس ما ينفعش اتجوزها” !

الجملة دي انا بقيت بسمعها كتير والصراحة من ايام الهكسوس لحد انهارده مش قادرة افهم يعني ايه بحبها بس ماينفعش اتجوزها …..
سألت مرة واحد من بتوع بحبها بس مش هينفع اتجوزها دول قالي ان الجواز حوار تاني ؛ “اصل الجواز مختلف مش جو حب وقلوب وبيبي انا عايز واحدة تنفع للجواز” ….
مافهمتش بصراحة بس الجملة دي أتكررت قدامي كتير والازمة انها أتكررت من بنات وولاد الموضوع مش حِكر على نوع معين لا سمح الله -ابسلوتلي- !
“انا بحبه اه بس ماظنش اننا ننفع نتجوز” ….
بردك !
هو بيفكر انه عايز واحدة يعرف “يأيفها على مزاجه” وهي عايزة واحد مهندس عنده شقة ويقدر يعيشنا ب ١٠ آلاف جنية في الشهر ونجيب شغاله من الكونغو مع البطاطين !
اكيد طبعا مش بعمم ولا بقول ان الكل كده ….
بس انا سمعت الجملة دي كتير لدرجة انها ربكتني !
اصل اللي انا كنت اعرفه زمان ان الواحد بيتعرف على حد ومع الوقت والعشرة بيتولد الحب اللي هو التطور الطبيعي بتاع الحاجة الساقعة بتاعته الجواز -مع الأخد في الاعتبار ان في النهاية كل شئ نصيب- !
بس اول مرة اعرف ان في ناس تنفع تتحب بس و ناس تنفع للجواز بس -وبرجاء عدم الجمع بين الاتنين-
للاسف الناس اللي بتقيم الامر بالشكل ده -مع كامل احترامي- عندهم مشاكل عويصة عويصة …. لا عويصة !
الدنيا ابسط من كده كتير -وأصعب على فكرة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.