الثلاثاء , سبتمبر 22 2020

شنطة سفر .. بقلم / محمد مبارك

انا احسن واحد يمثل
عكس اللى جواه
شخصية قلبى بتتحول
تبقى معاه و مش معاه
إزاى عندى القدرة
إنى أبان اقوى
و أنا أصلا أضعف مخلوق
إزاى بقدر اسامح و انسى
و تعاملنى الناس بقسوة
اتعامل بكل ذوق
عايز كل حاجة كاملة
فى المشاعر و المعاملة
أنا نفسي أصالح نفسي
أو هى اللى تصالحنى
مش فارقة مين هيبدأ
المهم إنى أصدق
أنا زى صابونة
و طول الوقت بتتبرى
و صباع طباشير فوق سابورة
يكتب ع الفاضى و ع المليان
يوصف على اد ما يوصف
ف الآخر يعمل شبورة
أنا نار و بكلمة بتطفينى
أنا الدخان
أنا زى الدايرة المقفولة
من وقت ما كنت ف سنة اولى
مش بسمحلها ابدا تكبر
قافلة عليا من يومى
بضحك من كتر همومى
و خايف للأوجاع تكتر
عدد أصحابى كان محدود
مكنش فى بيننا حد حقود
كنت اصحى من نومى بدرى
كنت عارف وقتها
طريقى فين
اكيد على مدرستى
عشت فيها أيام
حلوة و يا سنين
(شنطة سفر)
حواليا الناس بتودعنى
انا كلمة بسيطة بتوجعنى
(شنطة سفر)
جواها احلام
ف حضنها حبة صور
(شنطة سفر)
و مشاعر مردومة تراب
من كتر ما بفارق اصحاب
(شنطة سفر)
اهبد فيها لحد الآخر
تستحمل بردو و بتعافر
و ورق متقطع متنتور
و رواية عمرها ما هتكمل
كيان ثابت و لون باهت
و قلب منور
و رسالة بحاول ابعتها و بسأل
لكن معلش
أنا أكتر واحد رومانسي
و اكتر واحد ملوش قلب
فى وقت الهزل عصبي
و وقت الجد بقلب هزل
أنا لغز متعقد
و رمز متشفر
لا عرفت ألاقينى و لا لقيت حل
هدوء و دوشة و دربكة
مترتبة و متفككة
ماليش فى الحب سبوبة
بتلج كل إحساسى بأعجوبة
بحلم و اسافر
احب فى ناس و اثق فيهم
و كالعادة بنكر و اكابر
بدماغ انشف من انشف حيط
حياتى تشبه بكرة خيط
متلعبكة .. بسيط جدا
معقده و مركبة
بستغرب أنا الاتنين
مريح جدا و متعب
أناني و بحب غيرى
بجمد كل تفكيرى
و أطيب حد ممكن تقابله
مالهوش ف الكره شريك
لو فكر مرة ينتقم
يإذى نفسة مش يإذيك
أنا بأستيكة بمسحنى
من حياة كل اللى باعنى
بشطبهم بقلمى الجاف
لإنى بخاف
أرجع احن من تانى
فارسم حدود خنقانى
أرجع لأصل وحدتى
ما حياتى هى غربتى
الأول يشبه آخر
بوصل للنهاية
تنتهى البداية
من قبل ما تبتدى
يفضل جوايا صوت أخرس
فى عز سكوت
بسيب حقى و بطالب بيه لحد الموت
مع نفسي و لنفسي بعيش
و اقفل بمليون باب و أوارب شيش

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: