السبت , سبتمبر 19 2020

جراحة نفسية ….شعر سعدنى السلامونى

جراحة نفسية

مين اللى زرعها هنا
على صدر البحر
زرع تحتها سما
وفوقيها سما
كأنها صخر
يجى لها زلزال مرة
ومرة يجى بركان
وهى زى ماهى . ثابتة فوق الدهر
اللى تزرعه فى السنين
يدمره قهر الدهر
شهرها يحبل بالشهور
يولد شهر
********************
مين اللى زرعها هنا
بيوت
وغيطان وسواقى وفلاحين
وطوابير من الستات
شايلين الزلع وماشين
بيوت مرصوصة
فى عضم من لحم وطين
بيوت
هَبه منها ريحة العجين
هَبه منها سنين قديمة
شابكة فى سنين
والفاس والمنجل والتوم
والبصل والمحرات
عروق خشب وسطوح
********************
الليل
ينزل عليها فى الليل
يكسيها سواد

يزيح النهار بدون معاد
ولما يضعف الليل
فى الليل يعجز
النهار يقتله بأنواره الشداد
نهار غضبان
مليان عناد
وهى زى ما هى قرية نادر
هى خلاف كل القرى و البلاد
*****************
فى شارعها الوسطانى
فى الرحباية
عيال بتلعب مطاردة
وعيال بتلعب إستغماية
عيال
بتفلت من إيديها طيارات ورق
طيارات تسابق الطير
طيارة
ضربت فى عصفورة
صغيورة
وقعتها من جيش العصافير
كسرت جناحتها
سقطت تحت رجول الحمير
*******************
العيال خطفوها
بجرحها ودمها
فى وسط الطريق
عصام قطع حتة من جلابيته
وفرشها تحتها
نيمها على رجليه
وسماها عصفورة
الكلاب والقطط
عايزين يخطفوها من إيديه

راح ينده لها بإسمها
*******************
يا عصفورة
أنا إسمى عصام
إتكلمى
ولا إنتى ما بتعرفيش فى الكلام
مدى رجليكى سلمى
أهلك عايزينك فوق
حاولى تطيرى .. إتعلمى
*******************
فى ثانية
دخلت جاموسة محمد الدسوقى
فرمت الرجل التانية
عصام مش عارف العصفورة
ميته ولا نايمة
العصفورة
فى دمها عايمة
وبين اللحظة والتانية
يحدفها عصام لجيوش العصافير
العصافير
بتصوصو وتبص لعصام
تنزل لوش الإرض، وترجع تطير
العصافير
بتطيرها رجول الحمير
*******************

بلاش تكلمنى
إسمعينى بس
بس إسمعينى
أنا إسمى عصام
أبويا قتل امى .. قتلها بانتقام
قتلها قدام عينة
اب كافر ..ما يعرف الحلال م الحرام
الحكومه سلمته للمصحة النفسية
وتاه فى المصحات
كان بيقتلها وأنا تحت البطانية
السكينة كانت طالعة نازلة
زى المكوك
وهى بتصرخ صراخات مكتومة
****************
أنا عايش مع جدى
وجدتى
هم بيحبونى
لما يدخل علينا الليل
يحمونى
جدى يخدنى فى حضنه مرة
ويرمينى فى حضن جدتى
وكل مأنام
جروحى تصحينى تانى
قتلها الكافر بانتقام

******************

يا عصفورة
أبويا كان كل يوم يضرب فيا
يكتم بقى بالمنديل
وبمنديل يغمض عنيا
يكتف درعاتى فى رجلى

ويضرب فيا
مع كل خرازانه
الصرخه
تطلع من جوإيا تضرب فى المنديل
********************
فى يوم
رمانى وأنا متكتف
فى اوضة ضلمة
وقفل البيبان
الصراصير تجرى على وشى
وتدخل فى هدومى الفيران
نفسى فى كوباية مية
أنا جعان
اعض فى المنديل وأقول الطف
يا لطيف
ارحم يا رحمن
فك إيديه ورجليه
ابعت لى رغيف
أنا جعان
قومى يا عصفورة من الشارع
جاية جاموسة الحاج عبد اللطيف
قومى بسرعة
*****************
دب
دب
دب
دب
دب
دب
رجول الجاموسة بتوزع الخطوات
بتصحى الموت بالدبات
الرجل بتنزل ع الأرض تطب

هيلا هب
هيلا هب
دب ..دب
دب ..دب
فاضل عشر خطوات
قلب عصام ذاد دقات
العيال
بتقيس بقلبها المسافات
هيلا هب
دب ..دب
هيلا هب
دب .. دب
رجل الجاموسة
اسرع من صراخ العصافير
وترجع تطير
دب
دب
دب
دب
هيلا هب
العصفورة الأم
مرعوبة على بنتها
الجاموسة
بتشيل رجلها وتحطها
شالت الرجل اليمين لفوق لفوق
غرزتها فة لحمها
دخلت صوابع عصام بتلمها
فركت كف عصام
دمه طرطش جنبها
دم عصام غطى لحمها
********************
ما تخافيش يا عصفورة

ماتخافيش
بدمى حاغسلك
وجسمى ليكى ريش
بجسمى اكفنك
اقرا ليكى الفاتحة وادفنك
عصفورة .. يا عصفورة
ردى عليا أنا باكلمك
بلاش توجعينى
قولى إيه اللى بيئلمك
********************
أنا زيك بالظبط باعافر
صوابع أبويا فى جسمى حوافر
أبويا الكافر ابن الكافر
حوافره هى حوافر الجاموسة
أنا تحت منها .. نملة قملة ناموسة
عصفورة
ردى عليا يا عروسة
عصام
لملم لحمها بدمها
قطع لها حتة من جلابية العيد
وفرشها تحتها
حط عليها العصفورة
لفها
فحت قبر كبير وحطها
ردم عليها بالتراب
وجاب كوباية مبة ورشها
العيال بتعيط جنبها
********************
قروا عليها الفاتحة مرتين
قروا الفاتحة وايات من صورة ياسين
العيال مش حافظين
القطط والكلاب

لسه واقفين
*********************
العيال
دفنوها جنب الباب
الليل جاى من عند السحاب
تاتا تاتا
بتوب اسود هباب
نزل الليل على البلد
خلاها ضباب فى ضباب
الكلب
اللى هو رئيس الكلاب
جمع الكلاب
وراحوا ينبشوا على قبرها
***********************
القطط والفيران
واقفين بعيد
يبصوا على الكلاب
الأعداء على جسم العصفورة بقوا احباب
طلع عصام م الباب
يبص ع العصفورة
فى إيده خشبة مكسورة
طيرها على القطط والكلاب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: