السبت , سبتمبر 19 2020

على سبيل الرباعيات…..شعر مصباح_المهدي

الجزء الثاني 2

في الصورة كام كدَّاب وِقِفْ يرغي
دوشة وزياط مافيهاش أُذُنْ تُصغي
والنيل أغاني وشعر بين شطين
والقمح منهج ع العيال ملغي

*******

راسي طريق متسلمة مطبَّات
ولا فكرة عايزة تعدّي م الخَبَطَات
صدري صحارى لا شجر ولا ماء
بالي ليالي خاصمت النجمات

********

الشعر ممكن ينقلك خانة
من ركن خالي لحتة مليانة
الشعر خمرة حلال تعدي بك
بحر الأسى لمواني نشوانة.

*******

المستبد الأهطل الظالم
يكسب أكيد لو يدفع الديَّة
للبلطجي الاهبل وللعالِم
عربون شهادة زور علانية

********

فَرّقْ تَسُدْ بَقُوا خمسميت فرقة
على كل فرقة إمام عليل الراس
محتاجة فرز وغربلة تبقى
أُمَّة حقيقي من ( صلالة..ل فاس)

*********

السيف على رقبتي وفي الخاصرة
خنجر وتحت مخدتي تعبان
كدا أعلنوا إني من الذاكرة
باحكي وانا ميّت بقالي زمان.

*********

ماتوصَّليش القصة للمحكمة
قلبي وقلبك عصفورين ربما
يتقابلو تاني في فضاء تاني
ويعيشو قصّة حب مش مبهمة.

*******

أنا ليَّا فيها ولاد وزوجة وبيت
وفروع شجر عيلة طرح ياسمين
أنا ليا فيها رصيد من المعاناة
وليا فيا ساعات فرح وحنين

********

قبل الجنون بمحطتين يا اسطه
مجنون لوحدي بدون ولا واسطة
وَفّر كروت الشحن للعاقلين
يتجننوا أحسن من الجلطة.

********

أولادي بكره : وقفت المتاريس
مش قصدي حظ نحيس وقلب تعيس
إنا ع الصليب منذ الميلاد للٱن
عايش كأني دُخَان لجمر فطيس

*****

باستوعب الدرس اللي مافهمتوش
واجري ورا عمري اللي ماعشتوش
القلب تايه في المكان الخطأ
مع ناس خطأ إزاي ما رَجّعْتُوش

************

السيف على رقبتي وفي الخاصرة
خنجر وتحت مخدتي تعبان
كدا أعلنوا إني من الذاكرة
باحكي وانا ميّت بقالي زمان

***********

ياعم يا اللي بتطلق الإشاعات
ليه قلبي بس استهدفوه بالذات
قلبي عشق ماهو ياماعشقو قلوب
خليك في حالك مرّة م المرّات

********

ياعم قرطاس لب ع الكورنيش
لو لسّه فيه ميّه وفيه كورنيش
إيدك حبيبتي نبضها شاحن
قلبي وروحي بالمحبّة باعيش.

*********

الصبح خارج من كمام الليل
بيحني كف الرزق بالتساهيل
وانا من عنيكي لحد شط أمان
أبحرت مائي ومركبي المواويل

*********

ياعنيها تغسل م الهموم قنطار
منها إليها بابتدي المشوار
في ضلوعي أرض عمار بحسن بديع
تهمة شروع في العشق باستمرار

********

باشرب وجودك جنبي كاس ورا كاس
ياست حسن الجن حسن الناس
بافتح على بكره الأمل شبّاك
واحقن أمل وامشي بلا وسواس

***
في المنطقة العربية جاز والع
من كل ناحية الشوك نبَتْ طالع
ضرب الضعيف الاضعف كأن مريض
مارس في مَيّتْ والعَدُو قالع.

*****

نا مش راح اركب راسي يا سادة
موسى/ أديب/ بكري هم السادة
أفتح واعبّي وداني بالسخافات
واهيص واقول رائع فوق العادة..

********

إيدك في إيدي أعدي م الجلطة
سنتين بازحزح ورطة من ورطة
وابدو كأني مبتسم راضي
حتى اعتذرت بدون ولا غلطة.

******

أولاد في سن التوهة مندوهة
يابكره من كام فكرة معتوهة
ابني بناتي زرعة في صحراء
قلبي وقلبك مشتل التوهة.

********

المنطقة العربية سيرك قرود
مسرح تجارب للسلاح مفرود
ثورات بتوكيل رسمي م المحتل
جرت علينا خراب مالهش حدود

*****

نطق السكات بينّا كلام موزون
مجنونة سمعت شعر من مجنون
أنا وانتي لازم نحكم العالم
بالحب يا أجمل قانون مسنون.

*******

ياعيون حبيبتي أول المعراج
قلبي حبسته ف ضلمة الأدراج
شديه يودع عالم الضلمة
واديه براءة وصدقي الإفراج..

*******
استقبلوك زي الشيطان بالطوب
الناس تتوب م الذنب وانت تتوب
تفضل شيطان لا تتقبل توبة
خذ كل هذا الطوب واعمل مقام

********

بتقول لي عايزة تحس باطمئنان
أنا قرشك الممسوح مانيش هربان
متعلقة الرقبة بسقف البيت
بيني وبينك عقد كتبه الجان.

********

********
الناس بجد مبرشمة توهان
شايلة اللي فوق طاقة جبل صوُّان
في اللقمة طرف الحبل والتاني
مستقبل المُسْتَهْبَل الحيران.

*******
بردان كأني من سنة لوحدي
عطشان كأنك نيل نشف عندي
حيران كأنك توهة في التوهة
ضل اللي كان مصباح وكان مهدي
*******

أنا ما اخترعتش لسّه بال رايق
حاوصل أكيد بالخلطة دي فايق
حبة هطل على حبتين سخافات
نركب معاك ياكدب يا سايق

*******

أنا كنت يوم سمكةبقيت صياد
( غنيت ورحت اصطاد صادوني)
السود عيون هند اللي هبلوني
ورجعت سمكة بشبكة الصياد.

*******

الكدب كدب نحبو ونصدقو
بعدين بيحرق فينا أو نحرقو
نشرب عصيرو خمر مالو مثيل
ونمد إيدنا نضمو ما بنلحقو.

*********

يا عم يا ابو دماغ بلا عدة
حايحلها بس انته روق واهدا
فوق بس مرة وافهم المكتوب
تشتد تفرج تلتميت شدة.

*******

أنا باخترع لسه هطل واقي
أنا باخترع سمي وترياقي
باخدعني طول الوقت وباضلني
يمكن أروح للموت كيان باقي

*******

بلاش تحطي الفاضي ع المليان
أنا عندي ما يكفيني من أحزان
سيديهاتي عندك ؟هاتي م الٱخر
كم (مرتضى منصور؟) وكم هذيان؟.

*******

أنا باخترع فوقي قميص واقي
من صهد أشواقي وبرد الخوف
أنا باخترع ياسمين ما يدبلشي
لو ولع الصيف اللي جاي مولوتوف..

*******
ورا كل بسمة بتترسم ع الخد
تنهيدة جد الجد مستترة
كضمير مقدر رفعه م الجملة
ورا كل بسمة دمعة محفورة

********
ياصاحبي أي كلام ف أي كلام
الدنيا دي كروية والأنعام:
عايشينها يوم بالطول ويوم بالعرض
ولو ان مات ف العرض ناس أعلام.

********

دي مصر باعرف احبها من قبل
ما ينزلوا الشارع بفرقة طبل
ياابني استحي واعرف مقام الناس
أمااللي زيّك (قلنا رزق الهـبل)..

*******
اختار بكل عناية منفايا
أنا كلي لسه بحالو جوٌايا
حاخدني واهرب م العذاب(الدكر)
وٱخد معايا مركبي ومرسايا.

********
أنا يا حبيبتي للأسف مخلوع
من جدري شبعان جوع لساعة صفا
حواليا دقوا الخيمة للعاصفة
وانا وحدي جنبك نهب ريح الخضوع

********

دي الوقت بعد ما قفلوا الدكاكين
من بعد ماطحنت قلوبنا سنين
جايين نخضر أرض بور مالحة
نحلف على الصبار يكون ياسمين.
********

تقدر تجيب اللص من ياقته
لو كان حرامي غسيل لعن فاقته
وسرق رغيف م الفرن وبوقته
قبضوا عليه واللص حر طليق
********

الشمس ساكنة معانا ف الشقة
دا فرن هتلر دا اللي في الشقة
من فين حاتطلع بسمة فوق الوش
نعم بتطلع م الزهق لأه…
******

يابنت يا اللي أحلى م الأحلام
من فين طلع لي وشِّك البسَّام
غيطي اللي كان زرعة أسى وزرعة
تكشير طرح قناطير فرح وسلام.

*********
في النوم طاردني جيش من العفاريت
بيهدوا فوقي طوبة طوبة البيت
وانا وحدي كر وفر بادّارى
ولقيتني شكل المنتصر عدّيت..

******
لو مرة قلش الضرب فوق الراس
كل السهام من قوس جميع الناس
قاصداني وسط الزحمة ما أخطأت
وانا رغم أنف الموت شديد الباس.

*******

لا تشتري مني الكلام ببلاش
دا مش حطب دا قطن جرح وشاش
دا عمري رحلة قلبي عرض وطول
متبلورة حروفي أمل متعاش.

********

الموت: وجودك ف المكان الخطأ
الموت: بقربك م الصحاب الخطأ
والحب موت لو كان حبيبك خطأ
نام يا ابني ع الجنب اللي بيريحك.

*******

الأرض بنت بنوت تغشاها
فلاح وحط البذرة جواها
حبلت وجنب الترعة ولدت بنت
حبلت وجابت بنت ما احلاها.

******

على جنب باشرب شاي واعد النجوم
أقعد واقوم أكتب كلام واقراه
وأرتب المأساة لفيلمي الجديد
لازم يموت البطل ف المشهد الأول.

*******

داعش بتلعب سيجا ويا الروس
أمريكا تضرب ف الأسد والروس
والمشهد السوري اتقلب دومونو
سوريا بقت مسرح لنهش السوس

*******

شاربينه أحمد موسى من غير سكّر
شاربينه عمرو أديب على الريحة
شاربينُه مصطفى بكري يوم ورا يوم
يارب نخرج م الحكاية بخير.

*******

فتحوا علينا النار ماهوش بالضبط
فتحوا علينا مصطفى بكري
طب شكل أمك إيه إذا ضبطوك
مع مصطفى بكري بتشرب شاي

********

كان اللي باقي (زمزمية صبر )
خدها (جاهين) ويَّاه وساب لي القهر
راسي كأن حجارة من سجِّيل
قاصداه كأنه للعبور المهر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: