السبت , سبتمبر 19 2020

على مقام المجتث….. مربعات مصباح_المهدي

من لمسة كلبشتي روحي
ياقوة الشرطة روح
من إمته كانت جروحي
سلم لأبعد سطوح
*********
هات ياابني حبة رضا
من جوة جيب بنطلوني
خليني ألحق قضا
صلوات في معبد أموني
*****
حبة عبط لو سمحتم
محتاج أعدي الكمين
ولا ألف مرة دبحتم
قلبي شمال أو يمين
*****
تخلق ويعبد سواك
أزرع ويحصد واجوع
أسرح وأرمي الشباك
وارجع بصرة دموع
******
على راسي دقت طبول
على كتفي رقصت عوالم
فوق ضهري زادت حمول
وفي قلبي ضربوا العواصم
******
عايزيني أرقص دبيح
وأنزل كيوسف في جب
والبس صليب المسيح
من مكة اهاجر ليثرب
*******
دايسينها نفس الهموم
نفس اللي بدأت محبة
في الضهرشفناالنجوم
م القهر باسم المحبة
******
دقدقتو خمسين سنة
ف الراس لحد اما لانت
دورت فين مين أنا
مالقيتش غير ذكرى كانت
*******
بنلم لم الأماني
من تحت رجل الزمان
ونعيش في ضل الٱغاني
حالمين بمطرح أمان
******٪
نص ابتسامتك سؤال
والتاني ساكن كحيرة
نابض محبة وجمال
يا عطر طاف ف المسيرة
،********
مش بس سحرك سباني
وداني مطرح ما ودى
روحك تمطر أماني
قلبك بينبض مودة
********٪٪٪
قلبين في عرض الطريق
مستصعبين المسافة
أشواق بتنده بريء
يوصل لٱخر مسافة
*****٪
أضربها واحد في واحد
تضربني واحد في ألف
أعاتبها تصرخ يا جاحد
أصالحها تنده لألف
********
سجلته باسمي اختراعي
لحبيبة سميتها ليلى
وكتبت شعر بيراعي
وحكيته في ألف ليلة
******
القهوه والا ابتسامتك
عدلو لي راسي العليل
أنا لو بيكاسو رسمتك
جدارية تشفي العليل
******
باسم الكلام اللذيذ
باسم الوداد والمحبة
قزقزت حب العزيز
وسبت في جيوبي حبة
******
ودا كله طايح في كله
دايرين في ساقية مصالح
الشوك طرح كدب فله
وف لحظة جاب جاز فضايح
*******
قد تم قصفك بدانة
ياقلبي خد جنب وانزف
من قبل إثبات إدانة
أخرج من الأزمة منصف
*******
مافاضلش إلا ابتسامة
تحويشة للصيف خدوها
في عيوني نظرة ملامة
خدوها إوعوا تبيعوها
*******
لو كان على القلب شاف
أهوال عدد شعر راسي
عانى/ تحمل/ وخاف
من غير ما يوصل مراسي
*******
الموت بيبعت رسايل
بيقول لي جاي في الطريق
أنا مش راح اطلب بدايل
وسعت للموت طريق
********
جلابية ع العري واقفة
تبل (قنطار سمار)
والبرد له ألف وقفة
في ضلوع وعضم الصغار
******
ورا كل سارق رغيف
سارق تمانين طابونة
قطعوا دراع الضعيف
واعطوا له أكبر صابونة
*******
ورا كل ثورة جياع
قاتل سرق خان وعربد
ورا كل حالة صراع
ظلم اجتماعي مؤكد
*****
ورا كل بائس حرامي
خلاه يبيع اللباس
من غير ما احدد أسامي
واضحة بدون التباس
******
لموا الفلوس م اللصوص
تتحل أزمة مصر
مين اللي قال خص بوص
يدفع ضرايب قصر

*********
فيه ناس حمائم سلام
وناس حمم بركانية
تبدأ معاها بسلام
تردها لك أذية.
*******
ولإمتى حافضل أداوي
جراحي بجراح جديدة
زهق الدوا والمداوي
وقلبي بات ع الحديدة
*****
الشمس عازمة المجرة
على لحم راس المشاة
ياشمس ٱب قلبي بره
صدري على الفحم شاة
*****
الحرب يخسرها غيري
أنا صلب حتى النهاية
بإيديا بارسم مصيري
والنصر دستور وغاية..
*******
يا ستي يا اللي ابتسامتك
بيوصفوها الدكاترة
قاصدك مطاردني سمتك
م النوبة حتى ( الزعاترة).
*******
حمار وجارر (ترللة)
ماحد قال شد حيلك
ف الرمل ف البحر إلا
ماحد حافظ جميلك
*******
لو حتى (قنطار خشب
على ربع درهم حلاوة)
كنا نقول يا حلاوة
ونغني يحيا الخشب..
********
يا بسمة عذراء بتول
في وش إسفاف جماعي
الحشد على راسه غول
والرعب كتّف دراعي.
********
إبعت لنفسك جواب
إشكرها طبطب عليها
مافاضلش غيرك صحاب
تقدر تفضفض إليها.
*******
خرج الوطن م الطابور
واستنى وقت الدبح
بالدور بلاش ازدحام
ولكل واحد دور
******
ما أقدرش أقول غير حبيبي
المصري في كل مطرح
إرضوها تنتج وتطرح
العدل هوه الأساس.،

******
عالجوا مياه المجاري
ضخوها ف عبوة تانية
صبوها في نهر جاري
الحل في فيمتو ثانية..
*********

بتقول لي مالك؟ تمام
ٱخر مرح وانسجام..
سلّمت بيت ع المحارة
غناه (محمد حمام).
*********
أول***** ما يقولوا راح
حايبطّلوا نواح
ويجيبوا حد غيري
يكمّل ع الجراح..
*********
الناس دي ناس بجد
والناس دي ناس بدون
الناس دي ناس يُعَدْ
لدخولهم الكردون
*******
سيبوا الفلوس للصوص
ما تزعلوش الناس
وجددوا ف النصوص
وابنوا كيان م الأساس.

********

يعنيني دمعة مشرد
يعنيني ليه معدموه؟
يعنيني كل اللي مُبْعَد
بالنفي مش مُبْعدوه

******
أمريكا راعي السلام
وإسرائيل الوئام
واحنا ولاد اللئام
عايزينها نار قايدة..
*******
يدك ف جيب الغلابة
وسد عجز الموازنة
حصل وخلي الديابة
تشبع كروشها اللي وازنة.
******
كل اللي فات كان بروفة
للحرب بادأة النهاردا
لا الشمس فوق راسي وردة
ولا حتى محمود شكوكو
******
النار ذات الوقود
إذ هم عليها قعود)
إذ هم بيبنوا البلد دي
من تاني سجن وحدود
*********
أنا باسترد ابتسامتي
من لص باص الهموم
قعدت وقامت قيامتي
وانا لسه جوة الهدوم
*********
إيدك ف جيب الغلابة
وسد عجز الموازنة
حصل وخلي الديابة
تشبع كروشها اللي وازنة
*************
إستبدلو بو الوطن
واستبدلو بو الإلاه
قراقوش هلك والوطن
سبُح بحمد الإلاه.
********
فيه رزع عالي الإيقاع
فوق راسي جوّة الضلوع
ما اعرفشي إن كان صداع
أو دق زار أو سبوع.

*******
مستأنسين لطاف
مع أي حد راكب
و بوقت الانصراف
هاربين من المراكب..
*******
فيه ناس حمائم سلام
وناس حمم بركانية
تبدأ معاها بسلام
تردها لك أذية..
********
ولإمتى حافضل أداوي
جراحي بجراح جديدة
زهق الدوا والمداوي
وقلبي بات ع الحديدة..
**********
الشمس عازمة المجرة
على لحم راس المشاة
ياشمس ٱب قلبي بره
صدري على الفحم شاة
*********
الحرب يخسرها غيري
أنا صلب حتى النهاية
بإيديا بارسم مصيري
والنصر دستور وغاية
*********
يا ستي يا اللي ابتسامتك
بيوصفوها الدكاترة
قاصدك مطاردني سمتك
م النوبة حتى ( الزعاترة).
*********
لو حتى (قنطار خشب
على ربع درهم حلاوة)
كنا نقول يا حلاوة
ونغني يحيا الخشب.
*******
يا بسمة عذراء بتول
في وش إسفاف جماعي
الحشد على راسه غول
والرعب كتّف دراعي.
**********
إبعت لنفسك جواب
إشكرها طبطب عليها
مافاضلش غيرك صحاب
تقدر تفضفض إليها.
*********
فيه أسئلة ماجاوبتهاش
وسنين مضت ولا عشتهاش
إنتي الإجابات والفرح
بالله عليكي..الخوف: بلاش.
*******
خرج الوطن م الطابور
واستنى وقت الدبح
بالدور بلاش ازدحام
لكل واحد دور
*********
لو بينّا ساتر ترابي
وخط بارليف كمان
أنا كنت رغم اضطرابي
أعبر بكل اتزان..
***************
وسعت عليا البچامه
ضاقت في وشي الحياة
مشتاق لضل ابتسامة
تتعاش معاها الحياة..
******
الشمس عازمة المجرة
على لحم راس المشاة
ياشمس ٱب قلبي بره
صدري على الفحم شاة
******
كان الفساد للركب
دي الوقت غطى الباط
أوقات ضجيجُه رَكَبْ
على لحن الاستعباط

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: