السبت , سبتمبر 26 2020

بقالي كتير…..شعر إيمان الميهي

بقالي كتير
بطارد ضحكتي الأولى
يطاردني وجع بايت
محصلة التجارب غم
وخوف ثابت
محصلة الصحاب فرقة
أمل مدبوح
بسيف بارد
أنا كنت ف زماني رقصة النشوة
ونطة طفلة بتعاند عشان تعلى
وقلب اخضر حلف يوصل نهاية الدفا ف الحضن
حضن جامد
وجع جامد
أنا كنت انتفض لما حبيبي يأن
واخبي عنيه من الشمس أما تتعامد على ضعفه
واحط مراية القوة جبيرة تسنده فيقوم
والم من المشاعر توب بيستر وجعه قدامي
وابوس قلبه بنور أصلي ورباني
أنا لما ضربني الخوف جريت لعنيه فضربتني
ببرد وقسوة واستخفاف
ولما الحيرة كسرتني
رضيت آكل في صبري الجاف
وخلتني سنين التوهة استنى ..
وأغزل ف السنة الواحدة تمانية عجاف
أنا رضيت الكلام الحاف
وهو ما كانش يوم راضي
وعيشته ف قلبي مستقبل
وموتني أنا ف ماضي
وكان فاضي لكل الناس.. وليا بس مش فاضي
جريت منه فغلطني ف قصيدته وغير المغزى
وصرت الجاني والقاضي
قفلت الصفحة وفضلت أنتفض وأأن
ركب قلبي كبار الجن
فغيروا طبعي للأسوأ
مكان الحرق فوق روحي نزف عصبية وتطلب
ولسعة برد قلبي البكر حاولت اداويها باصحابي
أنا استغربت يوم نفسي فهجروني
وسابوا الحرق يوسع كل مرة فيها وجعوني
صبحت مشوهة جدا..
ملامحي مفيش لها تحديد
خرجت ساعتها للدنيا
سابتلي الدنيا جرح جديد
لقيت قلبي رضيع مش طفل
ولازم يبتسم بهدوء
لقيت الناس علامات حيرة واستفهام
وانا كل الطريق اللي مشيته زمان ٣ خطوات
أنا مش ماشية مع سني عشان خبرة سنيني فتات
لقيت وشي اتملى تجاعيد وانا ف حيرة
أنا مش حاسة امتى بقيت كده كبيرة
كلامي زمان تقل جدا
حكايتي بقت كما موال ف ليلة طويلة شعبية
يبان إنه اجترار للحزن
وهو ف أصله حزن اخضر
أنا لفيت على الباقيين
ومش لاقية كلام يتقال
ماهو ازاي توصفه لغيرك ..
ملخص تجربة معاشهاش
وأيه يجبر كمان قلبه يعيش فيها الوجع ببلاش
ماعادش في حاجة ترضيني
أنا وديني
بقول يارب نجيني
وحياتي الجاية ما اوصلهاش

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: