الإثنين , سبتمبر 28 2020
أخبار عاجلة

بال الحبيب ……قصيده للشاعر الزين سلمان

بال الحبيب _
أو وٓطر البٓحر_____
.
.
قُبال يجيك 

قُبال يٍبٍل خاطر المطر 
بالأمنيات 
وٓطر البحر في الموية 
كان الأمتداد
في الأرض أبعد من جراحات
الحروب 
تلوين مداخلا أغنيات
وإتشاح كل المحلات بيك 
تمام 
إمكن تهٍش في براح 
يتوجسك بحسن ظنو 
مع النسيم بحديقتين 
يتوهطك 
زي إي بت 
حُرّقة وحرارة واشتهاء
وردة 
وحلاوة 
ونجمتين 
لامي البدايات كلها في 
يدينك 
وما بتدينك 
زي مرايا ومكحلة 
مسكارا في يد تستعد 
تطلع على الريد 
في ثبات 
لو شُفتها 
تشهق عيونك كما ارتداد 
موية البحر من إي قٓيٓف 
قلبك يدق كما الخريف
نبضات وريدك مسبحة 
واقف حنينك في الرصيف 
كلك عشق 
وناكر يقينك بالبنات 
حاضن مشاوير سكتك 
ساكت على جُرح البعاد 
خليهو يقدر يحتويك 
أو يكتويك 
زي شوقك الفتح الدروب
خلي القوافل تسبقك 
بين كفها المشتولة 
حنة واحتلاب 
لهفة عيونا بجيتك 
راغ في الفراغ 
أغبش حنينك منفرج 
في شكل سبعة على الغُنا 
ناسي الألم البيهو 
صاعد يعتليك 
يا مُعتلي 
الرغبة القديمة في شامتا 
وماسك بتلات الزهور 
قابض 
رحيقا وهامتا 
ولابس وشحات الحضور 
ممزوجة بالقلق المجيد 
مربوطة خطوة شهوتك 
على سطوة الجسد 
العنيد 
يامُبتلي بالموبقات 
سكك الرحيل الشائكة 
وعشق النساء الشاهقات 
مثل السكاكين التي 
في كف وحدك تستغيث 
من الندم 
تقطع ليونة ظنك المموج 
عُهٓرٓا 
في دهاليز الكرم 
كلما حٓكّت أو إتكّت فيك 
البنات 
إنتفضت من الوداد 
يا نصل شوقك 
لو دخل شوفك 
عليهو وما لقى في طعنتو 
ليك انتماء
غير يقينك في الجري 
تتجاوزوا 
وترسم نجومك في الشجر 
تحسب عصافير جيتا 
في كل مساء
من سكة الأمل الوحيد 
واحد على كل البحار الشكلت 
مقدار تشوف 
كيف الضفاف 
خٓضًرة وجميلة وما بتخاف 
للاحتواء للاحتضان 
الموية والموج للمكان 
إنو البحر بسرح يغادر للبعيد 
جسد المراكب والغرق 
حلم البراحات النحاف 
إلهسه عانق للخريف 
من فرط حبو وامتنان 
في خاطر البت التصلي 
عشان تٓبّل شوق المطر 
أو تستريح هذي الحقائب
من مباراة السفر 
في إي زمان 
احلام تطارد للمجون 
في زحمة المدن الكبيرة 
تفضح أنوثة البرتكان 
خليني فيك 
عبيني بيك 
أهتف ويرجع لي صداك 
يشرخ مماسكة المكان 
بيك من بحر آخ من بحر 
كلما رجع زاد الوجع 
لبسني من همو القديم 
طلعني عريان 
للمطر

.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: