الثلاثاء , أكتوبر 27 2020

ورحمة قلبك الدافي….سجال : طلعت عامر و رضوى خالد

سجال بين الشاعر طلعت عامر والشاعره رضوى خالد

……..
ورحمة قلبك الدافي
لـ أعيش العمر لك وافى
وأتمشى مع قلبك على قلبى
وأشيلك فوق على اكتافى
®طلعت عامر ®

==============
ورحمـة حُبـك اللـي إتوفـي
ومُقابلاتنا اللي صبحت صدفة
وشوقِك اللـي بقـي أوهـام
ورحمـة فرحـة الأيـام ..
لـ هنساك وهنسـي كمـان
نسيان مش عادي وبـ حِرفه
® رضوى خالد®

===============

ونسيانى وأنا مهتم
ومهما يجينى منك هم
راح أنسى معاكى أوجاعى
وأشيل حِملك على دراعى
وأقول للدنيا ليكى تضُم
وهالضم همى فـ سكوتى
تعيشى وتاكلى بسكوتى
ياتعبى وهمى وشرودى
انا راضى يكون القرب فى الجنه
وانا عن نفسى مش فارق
إعيش مظلوم
أعيش محروم
مادام قلبك بيتشفى فـ يتهنَّى
تعيشى تدوسى وتربُِى
وفرحه لقلبى بـ تخبى
تعيشى يا لعبة الأيام
يا سارحه الكون على الأوهام
ولحظة جرح بتكَوْمى وبـ تعبى
ياهمى وفرحى وجنونى
بحبك رغم ما تكونى
بحبك فعل مش كلمه
ياساكنه القلب وعيونى
بحبك طول بحبك كَم
بحبك قد رمل اليم
بحبك خلى عندك دم
يا نسيانى وأنا مُهتم
®طلعت عامر ®

=============

وحياة حبك وشوقك ليا
هشيلك جوه حبابي عنيه
وهمد جدايلي لاعتابك معديا
وهغزل من توبي الحنيه
طالما علي حبي باقي
همد ايدي خد باديا
®رضوى خالد ®

=============

مدى ايدك ياللا مدى
نحضن الأشواق بشوقنا
ياليالى بينا هَدِّى
وابدرى الفرح ف جروحنا
قلبى جاى الليله عندى
ناوى يسكن جوه روحنا
® طلعت عامر ®

==============

بمد الايادي بشوق متشاف
طمن قلبك و أوعى تخاف
إوعى تعيش العمر عجاف
و أحمد ربك على دى النعمة
نعمة حزنك
بردو اﻷمر ما يستغناس
بكره هتعرف و هتتأكد
إن الفرح ما جاش ببﻻش
® رضوى خالد ®

===============

حتى الفرح ما جاش ببلاش
جاى بعذاب ودفعت له كاش
لما سألته يا فرح اشمعنى
رد وقال اكمنك عنى ما تستغناش
ماشى انا راضى وإنت القاضى
احكم بينّا ياعبد الراضى
ولا هتحكم كدا علـ الفاضى
اسمع منى واسمع منها
كل ما أقولها ايه أخرتها
تقعد تدلع علـ الهادى
وتسيبنى وتخرج عـ النادى
وانا أقعد مع نفسى اهاتى
وف الأخر تشتكى لحماتى
طب أعمل ايه انا فى حياتى
ماترد ياشيخ عبد الراضى
ولا انت ياشيخ كدا مش راضى
رد القاضى
اسمع ياواد انت هقولك ايه
الحق عليك يا سعادة البيه
بتطبطب على راسها وشالها
روح اعرف مين بس وشى لها
مين لغبط افكارها وحالها
لو مش عاجبك فكر حماتك
هى كمان شكيالنا حماتها
جرب مره تعيشوا وحديكوا
ولا يسمع حد بحكاويكوا
واتعلم ذى الواد زيكوا
دى مراته بتمسح خطاويه
وبتجرى بسرعه وترقيه
واهى صبحت خاتم فى ايديه
سيبك من كل الحساد
الحب بينجح لو ساد
ولا في عبيد ولا فيه أسياد
اسمع من عمك عبـ راضى
خلى كلامك هو القاضي
® طلعت عامر ®

===============

اعمل ودن طين وودن عجين
وامشي وقول رحمان يارحيم
البس توب الورع الاصم
واوعي تجيب لها سيرة الهم
وافرح وانسي الحزن وناسه
وان جه تاني وبقي في الوش
اديه ضهرك وامشي ياعم
® رضوى خالد ®

===============

انا سلمت خلاص وندمت
وأشهد لك انك كسبانه
انا غلطان وبقولك تبت
وانتِ القصه معاكى خلصانه
طول ما الحكم فى ايد الست
عمر فى يوم ما تقول اه يا انا
® طلعت عامر ®

================

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: