الخميس , أكتوبر 22 2020

عيدية …….شعر وليد العايش

بهل عيد جاي عبالي
جبلك هدية
شي حمل حطب
أو بيدون مازوت من كازية
وجرة غاز تمشي لحالا
وتغنيلك موال وغنية
بهل عيد جاي عبالي
جبلك عيدية
تسع عشر تلاف
تشتري فين
فطاير ولحمة مشوية
وتدفع أجار البيت
وفاتورة الكهربا
ويمكن المية
وتشتري فستان لمرتك
تا تبطل تنق عليك
ولو شي شوية
ولا تنسى بنطال
أحمر للحبيبة
تشتريه من الصالحية
لا تقلي ما بكفي …
وك شو بدك اجبلك
مال الدني عطية ؟؟؟
ياقلبي بهل عيد جاي عبالي
أبوسك ؛ بس خايف
تكون الشفايف كمان مرخية
خلينا نفرح بهل عيد
وبهل السنة
يلي وصلت بالسلامة
ومتل مابقولو بالعرس عنا
كلو أهلية بمحلية …
وحياتك رح خلي راتبك
يرقص عالوحدة ونص
وأنت ترقص لحالك طواعية
وك بهل عيد جاي عبالي
جبلك هدية
بس والله هلكنا الفقر
والجيبة يا خطيتا مهرية
حل عني بالله عليك
قبل ما تجيني
شي أزمة قلبية
وك مافي هدية ولا حدا
كلوا خرط بخرط
ومجنون يلي بيصدق
كذبة مخروطة
بمخرطة محلية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: