الأحد , أكتوبر 25 2020

وحشتيني …..شعر/مني جلال

ورغم انك فارقتيني
بحس انك ما سبتيني
وحشتيني
كأنك راجعة من تاني
وبين حضنك تضميني
وحاسه الموت يادوب مشوار
وراجعة منه تاخديني
وحشتيني
واحشني كل شيء فيكي
ومشتاقة تعودي يا أمي من تاني
وجوا ف روحي اخبيكي
دا انا ف بعدك يوماتي بموت
وحاسة الدنيا من غيرك
سكوت ف سكوت
ومش حاسة بأي أمان
ولا شايفة حبيبتي حنان
ومن بعدك مافيش ولا قلب بيطبطب
ما فيش ولا حد بيقرب
ومن بعدك مافيش احباب
ماحدش يا امه دق الباب
وكل الناس بقت أغراب قصاد عيني
وحشتيني
وعايشة يا امي ع الذكرى
وخايفة تملي من بكرة
وصورتك عايشة جوايا
مافيش غيرها تواسيني
وحشتيني
وبستناكي قبل ما انام
واصبر نفسي بالأحلام
وتيجي يا امي واحكيلك وأشكيلك
من الدنيا وم الأيام
ومن ظلم البشر ليا
ودنيا ما فيها حنية
وقسوة عمري وسنيني
وحشتيني
ومش مرتاحة وانتي بعيد
ودمعي يوماتي فوق خدي
وحزني كل يوم بيزيد
خلاص يا امه مافيش أفراح
ولا حتى في بال مرتاح
ولا بييجي يا أمي العيد
بشوف الضلمة عز النور
وضهري في الحياة مكسور
وشايفة الدنيا دي غابة
كأن الكون فضا مهجور
ياريتك يا امه تاخديني
هاكون مبسوطة مرتاحة
تعبت يا غالية ع الآخر
ونفسي أحس بالراحة
انام جنبك تدفيني
ونرجع تاني زي زمان
بكل ما فيكي تحميني
واقولك يا امه من قلبي
وحشتيني .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: