ماقدرتش أقول الحق…..شعر محمود يحيي

ماقدرتش أقول الحق
ولا أرد ب آه أو لأ
كان كل اللي شاغلني ساعتها
أهرب من شك عنيها السود ..
الحب بيسكت أحيانا لكن موجود .

يمكن تتخيل في الغنوه صوره وأوجاع
يمكن تتلفت في القهوه
على واحد زيك وحداني من بعد خداع
تتقاسم جنبه سنين عدت
وتلاعبه كمان عشرة طاوله على جرح قديم ..
الليل بيخبي ف ملامحنا
وماحدش فينا يا قلبي سليم
لكن بنعيش .

أكتر من مره حاولت انسى
وارجع ندمان
الحب الأول ف حياتنا زي بطاقه .. مهنه وعنوان
تتغير فينا حاجات ياما
ويفضل وحده علامه غويطه
محفوره بخوف ..
الحب الأول مش ممكن يتبدل أبدا بمسافه
وحياه وظروف
مهما جرحنا بإحساس خيبان .

ماحناش أقوى من الدنيا ف شيء
وقلوبنا كمان أضعف فعلاً واهون بكتير
أول ما يدق البال ذكرى .. بياخدنا الشوق
نضحك ونطير
ونفارق كل الناس تِمًا رغم وجودنا
ورغم الهيصه ودوشة ل الاحباب
جوانا حنين ف الأصل عجوز ولكنه شباب
بيهز ف روحه ويتمايل على نغم العود ..
الحب بيسكت أحيانا
لكن موجود .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: