الثلاثاء , مارس 2 2021

تعى اليوم….قصيده للشاعره هناء داوودي

تعى اليوم
تعى بكرة
أو قلك
تعى امبارح
مو كتير مهم
المهم انك تجي
تعب القلب
و ملت الروح من الصبر
تعى متل نسمة فرح
متل ضحكة طفل
تداوي هالقلب من القهر
ترسم ضحكة
تمسح دمعة
تقطف ورود العمر
مشتاقة ضمك
مشتاقة شمك
مشتاقة شفايفي تغرد باسمك
تعى بدون زعل
بدون عتب
بلا و لا كلمة
خلي عيوننا بس
هي يلي تحكي
عن أمل ما فارقني
ع أحلام كنت فيها الي وحدي
عن دموعي يلي غرقت مخدتي
لما ما لاقيك حدي
تعى نلملم الفرح الهربان
نطوي دفاتر النسيان
نحلي مر الصبر
نقلع أشواك العمر
و نزرع بدالها
حبق و فل و سوسنة
تعى نضوي القناديل
نشعل الجمر
تعى بحياة الشوق
وحياة جنون الهوى
ملعون أبوه هالعمر
ألف مرة
اذا مارح تجي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: