الأحد , يونيو 20 2021

شعور البنت….فصيده للشاعر محمود يونس

شعور البنت

فكرت أوصف شعورك

كأنى مرايه جواكى

كأنى جزء من نفسك

وعاش طول الحياه يحلم

بإنه فى لحظة يلقاكى

جربت أوصف أمانيكى وأحلامك

فرحك وحزنك وخوفك

وإحساسك بناس باعت

وناس مرسومه قدامك

ومين حبيتى ومين حبك

ومين تتمنى يوم تلاقيه

ومين عايش فى وجدانك

وتتمنى فى يوم تنسيه

ومش قادرة

ومين مشاعره كات صادقه

ومين مشاعره كات غادرة

وواحد كل يوم تشوفيه

كأنه خيال

وواحد رغم إلحاحه

عمره مايوم خطر ع البال

جربت أعيش

إحساس الوحده والحيره

وسهر الليل مع الغيره

وتكشيره

لان الدنيا بتعاند

ومحدش من البشر ساند

شعورك لما تفتكرى

فى لحظة فارس الاحلام

ونظرة عينه وسكوته

وأحلى كلام

وإيد تضم وتطبطب

مشاعر صادقه بتقرب

وقلب برئ لأول مره بيجرب

شعور الحب

ونار الشوق

حاجة بتاخد الإنسان

من الدنيا

تشده لفوق

كأنه فى السما طاير

ونفسه الوقت يستنى

ويفضل عمره يتمنى

بإن اللحظة ما تعديش

وخايف إنه يستنى

نفس اللحظه من تانى

لكن ما تجيش

وإحساسك بإن العمر بيعدى

وخوفك من ظهور تجاعيد

وحالة حزن وخداكى

لحزن جديد

ورغم الوصف مقدرتش

أعبر ع اللى جواكى

ومين يقدر فى يوم يوصف

شعور البنت

أنا آسف لأنى إتجرات

وعذرى إن أنا استاذنت

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: