الجمعة , سبتمبر 25 2020

أنا قلْبى زَيى الليل .. شعر : نشأت عطية

أنا قلْبى زَيى الليل
قمر.. ونجُوم..
والنِسْمَة فيه تَرَاتِيل
جيىْ بِزمَان الصِبَا…
فارِش نَسَيْم النَدى… موَاوِيل
بيْغَنِى للمُشتَاق
واللى ضنَاه أهْوَاء
واللي فاتُوه وعلِيل
…………………
أنا قلبى ضِلة شَجر
مَادِد فِروع للكُل
بيسَامِح اللي هَجَر
وسَاب هوَاه في الضِل
يصْحَى بدعْوِة مطَر
وينَام غريب الظِل
مسْتَنى دعوة قَدَر
يمْكِن حبيبه يهِل
يالي انتَ غَاوي السَهَر
قرَب غِيطَان الفُل
وازرَع معايَا القمَر
ويا النجُوم فى الطَل
هتلاقى حِلم وخبَر
وتلاقي زيي..
.قلبك مليه الكُل
………………….
أنا قلبي رَق ومَال
وحبِبْهَا بالموَال
تئسَى نايَات الزمن
أعشق بشوقى وصِال
…………………….
ملت خطُوطي القلم
وكتبت فيكى بألم
والشعر كان ولَد
جوايا عمري اتوَلد
وف قلبي عاش أبطال
……………………
أنا قلبى كِلمة وبوح
عاشِت زمان مجروح
بس زمَاني جبَر
وعرِفت معني الروح
(نشأت)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: