السبت , يناير 16 2021
أخبار عاجلة

احمد عفيفي يكتب : ليه الزمالك اتغلب؟!!

شوفوا.. انا زملكاوي بس عمري ماكرهت الأهلي .. وأصدقائي من الأهلاوية اكتر بكتير من الزملكاوية .. وكنت بشوف الماتش امبارح مع ولاد اختي وكلهم اهلاوية .. والشهادة لله بعد جون الأهلي الاولاني والزمالك ماسك الماتش بثقة مفرطة .. وانا نفسي كان عندي نفس الثقة .. فمش ممكن يكون ده الأهلي أبدا .. دي فرصة كبيرة للزمالك يغلب بسكور كبير كمان .. لكن الثقة الغبية اللي كانت عندي ، كان عند اللعيبة ثقة أغبى منها .. بيلعبوا حلو جدا وبراحتهم ع الأخر .. وحاسين ان الفوز في جيبهم.. لكن كلمة حق .. دفاع الأهلي تفوق على مهاجمي الزمالك .. فعلا مفيش فرصة واحدة حقيقية تقول بعدها للشناوي برافو يا بطل .. يا أحسن حارس مرمى في مصر .. لأ .. استحواذ وسيطرة وسط الملعب دون تهديد حقيقي لمرمى الأهلي.. ومش عارف باشيكو مفكرش ازاى في طريقة تفك التكتل الدفاعي عند الأهلي.. مصطفى محمد مترفعتش كورة واحدة له من اليمين او الشمال .. وزيزو هو الوحيد اللي قاوح بجدية وأرهق الدفاع .. ولو الشوطة اللي جت في العارضة دخلت كان الماتش خلص.. وواضح ان محمود علاء متأثر جدا بالكلام عن الونش وانه أحسن مدافع في مصر حاليا .. فتحس ان تركيزه بقى ضعيف والكورة اللي أهداها لقفشة وجاب منها جون ميتصدش، تدل على توهان علاء اللي كان المفروض يكون أكثر ثباتا واتزانا.. لكن قدر الله وما شاء فعل .. مكتوب للأهلي يفوز في أسوأ مباراة لعبها في حياته باستثناء مدافعيه اللي فعلا كانوا أحسن من مهاجمي الزمالك الأفذاذ.
لكنها كما قلت الثقة المفرطة في الفوز وان المسألة مسألة وقت هى اللي خلت الزمالك يتغلب.. وهى الكورة كده .. صحيح الزمالك كلعيبة أمهر كتير جدا من الأهلي .. لكن قفشة عملها بجون رهيب وجاب البطولة للقلعة الحمراء.. ولازم نقول مبروك طبعا على الفوز اللي كان في ايدينا وفرطنا فيه.
( مشفتش أغبى من مهيب )!!
في الوقت اللي كلنا بنادي فيه بعدم التعصب .. الاقي المذيع اللي اسمه مهيب في برنامجه اللعيب عامل فرح وزفة بلدي في الأستوديو احتفالا بفوز الأهلي .. لو رقص وهز وسطه وزغرد كمان بعد مباراة لمنتخب مصر ، كان يبقى مقبول.. لكن – وانت راجل اعلامي – تعمل كده وتجيب سعد الصغير يقلب الأستوديو مهرجان سئ وغبي ورافع انت وهو علم الأهلي ، تبقي منتش مذيع ولا بتفهم بتعريفة في الأصول.. واللوم كله على كابتن جمال عبد الحميد اللي كان معاه في الأستوديو مع مصطفى يونس ورضا عبد العال .. وهو كأنه مات له ميت ، مش مجرد فريقه انهزم.. وانا لو منه ، كنت احتراما لنفسي وتحقيرا لما فعله مهيب والصغير ، كنت قمت ومشيت رافضا التعبير عن الفرحة بهذا الاسلوب الغبي والسمج.. لكن ابقى قاعد استقبل تعازي الشامتين وأفضل قاعد عشان حاخد كام الف جنيه آخر الحلقة، فهذا لايليق أبدا بنجم منتخب مصر في كأس العالم ٩٠.
اللي كان غبي برضه خالد الغندور اللي شاف الحكم الجزائري ظلم الزمالك بعدم احتساب بنالتي ل بن شرقي .. بس انا شايف ان الحكم كان عادل جدا ومتزن جدا وأدار المباراة بهدوء وثبات رغم حساسيتها.. ثم لومه على ابو جبل بعد فشله في صد كورة قفشة.. دي كورة لايمكن تتصد.. رايحة في مقتل .. زي هدف شيكابلا العالمي لايسأل عليه الشناوي.
أصدقائي الأهلاوية المحترمين جدا اكثر مني حزنا على تحفيل وسخرية بعض المعاتيه الأهلاوية من شيكابلا .. ورأيهم ان شيكابلا وهدفه المارادوني في الأهلي يستحق عليه التحية ، لأنه من جماله أمتع الجمهور المتذوق لفن اللعبة أيا كان انتماؤه .. ومستائين اكتر مني مما فعله بعض مشجعي الأهلي في الشارع من حملهم لكلب وهتافهم شيكا شيكا.
عيب وعيب اوي ان يصل الأمر الى هذا الحد .. افرحوا زي ما أنتم عايزين.. لكن تهين انسان بهذا الشكل .. تبقى مش بني ادم.
……….
يالا .. ماتش يفوت ولا حد يموت .. وياما حنتقابل تاني.. واللي مفرحش النهارده يفرح بكره .. وفي الأول والأخر .. دي كورة .. مش معركة حربية .
مرة تالتة .. مليون مبروك للأهلي رغم قناعتي وقناعة الأهلاوية نفسهم انه ملعبش حلو أبدا .. بس قفشة الله يجازيه.. قلب الترابيزة على دماغ الزمالك اللي غروره هو اللي غلبه.. مش الأهلي.!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: