ﻣﻦ ﺯﻣﺎﻥ ﺧﻮﻓﻮﻧﻰ….قصيده للشاعر سعيد شكري

ﻣﻦ ﺯﻣﺎﻥ ﺧﻮﻓﻮﻧﻰ
ﻣﻦ ﻏﻴﻄﺎﻥ ﺍﻟﻘﺼﺐ
ﻣﻦ ﻓﺦ ﻟﻮ ﻳﺘﻨﺼﺐ
ﻫﺘﺮﻭﺡ ﺣﻴﺎﺗﻚ ﻫﺪﺭ
ﻭﺍﻧﺘﻰ ﺍﻟﻠﻰ ﺣﺒﻚ ﻗﺪﺭ
ﻳﺎﺣﻠﻤﻨﺎ ﺍﻟﻤﻐﺘﺼﺐ
ﺑﻴﻦ ﺍﻟﻮﺭﻳﺪ ﻭﺍﻟﻌﺼﺐ !!..

ﻭﻣﻦ ﺯﻣﺎﻥ ﻛﺘﻔﻮﻧﻰ
ﻭﺭﻣﻮﻧﻰ ﻑ ﺍﻟﻄﻮﺍﺑﻴﺮ
ﻭﺳﻤﻌﻮﻧﻰ ﻛﺘﻴﺮ
ﻭﻋﻠﻤﻮﻧﻰ ﺍﺧﺎﻑ
ﻡ ﺍﻟﻔﻘﻪ ﻭﺍﻟﺘﻔﺴﻴﺮ
ﻭﺍﻟﺬﻧﺐ ﻭﺍﻟﺘﻜﻔﻴﺮ
ﻣﻊ ﺍﻧﻰ ﻟﺴﻪ ﺑﺼﻴﺮ !!..

ﻭﻣﻦ ﺯﻣﺎﻥ ﻓﻬﻤﻮﻧﻰ
ﺇﻥ ﺍﻟﺤﻴﻄﺎﻥ ﺑﻮﺩﺍﻥ
ﻳﻌﻨﻰ ﺍﻟﻠﺴﺎﻥ ﻳﺘﺼﺎﻥ
ﻳﺎ ﺍﻟﺴﺠﻦ ﻭﺍﻟﺴﺠﺎﻥ
ﻭﻣﺸﻴﻨﺎ ﻉ ﺍﻟﺒﺮﻣﺠﺔ
ﺇﺷﻤﻌﻨﻰ ﻑ ﺍﻟﺒﻠﻄﺠﺔ
ﺍﻟﺴﺠﻦ ﻟﻠﺠﺪﻋﺎﻥ ..؟ !!

ﻭﻣﻦ ﺯﻣﺎﻥ ﻋﻠﻘﻮﻧﻰ
ﻑ ﺳﺎﻗﻴﺔ ﺍﻟﻌﻴﺸﺔ
ﻭﺍﻟﻤﻬﺮ ﻭﻏﻮﻳﺸﺔ
ﻭﺍﻟﺒﻴﺖ ﻭﺗﺤﻮﻳﺸﺔ
ﻋﻠﺸﺎﻥ ﻣﺎﺗﺘﺠﻮﺯ
ﻳﺎﻫﻠﺘﺮﻯ ﻧﺎﺻﺢ
ﻭﻟﻼ ﺑﺘﺘﺄﻭﺯ ؟ !!

ﺩﻭﻝ ﻣﻦ ﺯﻣﺎﻥ ﺳﻠﻤﻮﻧﻰ
ﻟﻐﺮﻓﺔ ﺍﻹﻧﻌﺎﺵ
ﺗﻌﻠﻴﻢ ﻭﻣﺎﺑﻴﺴﻮﺍﺵ
ﻭﺧﻠﺼﺖ ﻡ ﺍﻟﺘﻌﻠﻴﻢ
ﺑﺼﻴﺖ ﻟﻘﻴﺘﻨﻰ ﻣﻌﺎﺵ
ﻭﺃﺭﺑﻊ ﺧﻤﺲ ﺍﺧﻮﺍﺕ
ﻭﺍﻷﻭﺿﺔ ﻣﺎﺗﺴﺎﻋﻨﺎﺵ !!..

ﻳﺎﺟﻨﺔ ﺍﻷﻭﺑﺎﺵ
ﻋﻤﺮﻯ ﺍﻟﻠﻰ ﻓﺎﺕ ﺇﺳﺮﻕ
ﻭﺍﻟﺪﻡ ﺳﺎﻝ ﻉ ﺍﻟﻌﺮﻕ
ﻗﺎﻟﻮﺍ ﺍﻟﺒﻌﻴﺪ ﻳﺘﺤﺮﻕ
ﺑﺲ ﺍﻟﺪﻳﺎﺑﺔ ﺗﻌﻴﺶ !!..

ﺳﻜﺖ ﺍﻟﻜﻼﻡ ﻉ ﺍﻟﻮﺭﻕ
ﻭﺭﺟﻌﻨﺎ ﻟﻠﺘﻬﻤﻴﺶ !!..
ﻭ ﻑ ﺯﺣﻤﺔ ﺍﻟﺘﻐﻴﻴﺮ
ﻟﺒﺴﻮﻧﺎ ﻛﺘﻴﺮ
ﻗﻮﺍﻧﻴﻦ ﻋﻠﻰ ﻓﻮﺍﺗﻴﺮ
ﻃﺎﺏ ﻏﻴﺮﻭﺍ ﺍﻟﻤﻮﺍﺳﻴﺮ
ﻭﺇﺳﻘﻮﻧﺎ ﺑﻮﺀ ﻧﻀﻴﻒ
ﻣﺶ ﻣﻴﻪ ﺑﺎﻟﻔﻮﺳﻔﺎﺕ
ﺍﻟﺮﺣﻤﺔ ﻳﺎﻳﻬﻮﺍﺕ
ﺩﻩ ﺍﻟﺸﻌﺐ ﻛﻠﻪ ﻓﻘﻴﺮ !!..

ﻣﺶ ﺣﻤﻞ ﺩﻯ ﺍﻟﻤﺼﺎﺭﻳﻒ
ﻭﻣﺎﻋﻨﺪﻫﻮﺵ ﺗﻜﻴﻴﻒ
ﻭﻣﺎﻋﻨﺪﻫﻮﺵ ﻗﺎﺿﻰ
ﻭﻻ ﻋﻨﺪﻩ ﺑﺎﻝ ﻓﺎﺿﻰ
ﻟﻌﻤﺮﻭ ﻭﻟﻼ ﻟﻤﻴﺲ !!..
ﻭﺍﻟﺮﻃﺮﻃﺔ ﻉ ﺍﻟﻔﻴﺲ
ﻭﻻ ﺣﺘﻰ ﻋﻨﺪﻩ ( ﺧﻤﻴﺲ)
ﻣﻊ ﻛﻞ ﺩﻩ ﺭﺍﺿﻰ !!..

اخد ﺍﻹﻣﻮﺭ ﻋﺎﺩﻯ
ﻭﻗﺎﻝ ﻫﺘﺘﻐﻴﺮ
ﻭﺍﻟﻤﻮﻟﻰ ﺑﻴﺼﻴﺮ
ﺃﺑﺪﺍﻥ ﻋﻠﻰ ﺃﺑﺪﺍﻥ
ﺑﺲ ﺍﻟﺤﻴﻄﺎﻥ ﺑﻮﺩﺍﻥ
ﻧﺴﻜﺖ ﻣﺎﻧﺘﻜﻠﻤﺶ ..؟ !!

ﻃﺎﺏ ﻭﺍﻟﻠﻰ ﻣﺎﺗﺤﻤﻠﺶ
ﻭﻛﺮﺍﻣﺘﻪ ﻣﻮﺟﻮﻋﺔ
ﻳﺴﻜﺖ ﻋﻠﻰ ﺍﻟﺠﻮﻋﺔ
ﻭﻟﻼ ﻋﻠﻰ ﺍﻟﻤﻄﻠﻮﺏ
ﻭﺍﻟﻌﺪﻝ ﻟﻴﻪ ﻣﻌﻄﻮﺏ
ﻭﻣﺮﺍﺭﺗﻪ ﻣﻔﻘﻮﻋﺔ ..؟ !!

ﻗﺎﻟﻮﺍ ﺍﻟﻮﻃﻦ ﻟﺴﺎﻩ
ﻓﻰ ﻣﺮﺣﻠﺔ ﺗﻜﻮﻳﻦ
ﻣﻊ ﺛﻮﺭﺗﻴﻦ ﺍﺗﻨﻴﻦ
ﻟﺴﻪ ﺍﻟﻬﺮﻡ ﻣﻘﻠﻮﺏ !!..
ﻳﺎﺣﻘﻨﺎ ﺍﻟﻤﺴﻠﻮﺏ
ﻓﻰ ﻋﻴﺶ ﻭﺣﺮﻳﺔ
ﻟﺴﻪ ﻛﻤﺎ ﻫﻰ
( ﻭﻓﺎﺗﺤﺔ ﺭﺟﻠﻴﻬﺎ )
ﻭﺍﻟﻜﻞ ﺑﺎﻉ ﻓﻴﻬﺎ
ﻭﻛﺄﻥ ﺩﻩ ﺍﻟﻤﻄﻠﻮﺏ

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: