شاطرين….قصيده للشاعر رمزي بشاره

شاطرين فـ تأليف القصص
شاطرين فـ تحريف الكلام
وبيضربوا تحت الحزام
القُرب منْهم للأسف
مضر بالصحة وسام
في الكدب وفـ لبس الوشوش
يستاهلوا ١٠٠ جايزة ووسام
ممكن فـ ضهرك يطعنوك
لكن فـ وقت أمَّا يشوفوك
يلاقوك بحضن وبإبتسام
ومن خططهم إنهم
يتمسكنوا ويستعطفوا
فيستفيدوا فايدتين
يِستَعْدوا بعض الناس عليك
ويبقوا محور الإهتمام
بلاش تركز ويا دول
دول مكارين وهيعرفوا
لقوتك يستنزفوا
ماباآقولشي إدفن فـ الرمال
راسك كده زي النعام
وفَّر جهودك دي لشيء
أفيد .. يكون عايز رجال
وفر جهودك دي لميدان
يكون حلال فيه القتال
ويبقى في ذِهني سؤال
جاوبوا عليه لو تعرفوا ..
الناس دي إمتى هينضفوا ؟!
الناس دي إمتى يقلُّوا ؟ ليه
بيزيدوا عام من بعد عام ؟
حسست ليه على بطحتك
أنا ماجيتشي ناحيتك
لو حاسس إني أقصدك
فأنا أقصدك ..
لكن كلامي بوجه عام

 

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: