محمد موسي يكتب :سبوبة نسائية

تجلس فاديه مسترخية على كنبة الأنتريه تشاهد شاشة التليفزيون دون اكتراث به ، و بيدها الموبايل الذكي الجديد تقلب فيه و تتحسس شاشته ، فتبتسم تارة و تعبس تارة أخرى ، ثم تهز بدنها متراقصة مرة ثالثه ، و كأن بها مس من جنون .

تلقى برأسها للخلف و تضع رجل على رجل و تمسك بذقنها بين الإبهام و السبابة … و تسرح و كأنها تخطط لغزو دولة مجاوره .

يقطع صمتها جرس باب الشقة بنغمات متقطعة تعرفها …

إنها رنة صديقتها الأنتيم سعاد ..

تقفز من جلستها مسرعة للباب و تفتحه مهلله مرحبة ..

فاديه : يا أهلا يا أهلا بحبيبتي النسّايه اللي مش بتسأل ..

سعاد : ( و هي تحتضن و تبوس صاحبتها بشده ) أنا اللي نسايه يا جاحده … انتي كنتي افتكرتيني حتى بتليفون ….

فاديه : ادخلي يا حبيبتي ادخلي … احنا هنتكلم ع الباب ( و يدخلا و تغلق الباب ) … احكيلي فينك من كام يوم .

سعاد : أبدا يا حبيبتي كان عندي دور برد … قفلت بابي على نفسي و كفيت خيري شري … خفت لتطلع المنيله كورونا … و ركزت ع اللمون و البرتقان و المشاريب السخنه و اتكلفت في بطانيتين و لحاف … قلت أما اشوف آخرتها …

فاديه : ( مبتعدة منزعجة ) وغوشتيني … هاااا … و بعدين إنجزي الله يكرمك ..

سعاد : أبدا اتطمنت أنه دور برد عادي و خلص و أنا قدامك زي الفل أهه … عمر الشقي بقي ..

فاديه : الحمد لله طمنتي قلبي … تصدقي يا سوسو إنتي لسا حالا كنتي على بالي و لو اتأخرتي شويه كنت هاتصل عليك و يمكن كنت جيت لك كمان .

سعاد : ياختي يا ريتني اتأخرت حتى كنتي جيتي سليتني شويه و عملتي لي حس في الشقه ، أحسن مانا قاعده وحدانيه بين أربع حيطان زي قرد قطع وللا الشيخ المقطوع ندره باكلم نفسي بين أربع حيطان بعد ما اتطلقت من جوزي الأخراني ….

فاديه : قطيعه تقطع الجواز و سنينه …. لا المتجوزه مستريحه ولا المتطلقه سعيده ..

سعاد : ليه بس يا فيفي … كفا الله الشر .. مانتي يا اختي متدلعه و متنغنغه … و وليد مش مخلياك عايزه حاجه .. ما تخافيش أنا مش باحسد … انا بانق بس … ههههه

فاديه : يا ختي بلا خيبه … خليني كاتمه في قلبي و ساكته … و ليد دا من برا هله هله و من جوه يعلم الله .

سعاد : فضفضي يا ياختي فضفضي قلقتيني … زيحي من على قلبك يا حبيبتي …. هو وليد عيان وللا حاجه … يعني مش مقضي الواجب معاك و … هههههه

فاديه : يوه جاتك خيبه يا سوسو … انتي مش همك إلا على كدا و بس … دا بس اللي يهمك في الجواز … لا يا ست اتطمني … من جهة كدا … و ليد بسم الله الله أكبر ….دايما جاهز و مستعد ، بس هو اللي شغله أهم حاجه عنده و المكاسب كل ما بتزيد يحب شغله أكتر .

سعاد : أمال مالك فيه أيه … أيه بقي الوحش فيه اللي مزعلك ..

فاديه : حرصه يختي … عنيه في شبكة راسه ، و بخيل جلده … مش عارفه أخنصر من وراه كام ألف كدا في الخباثه ما يعرفهمش ، ما حدش عارف بكره مخبي أيه و الرجاله ما تضمنش …

سعاد : طيب و انا مالي يا لمبي … عايزاني أثبته في حته ضلمه و اسرقهولك …. هههههه

فاديه : هو دا مربط الفرس و اللي كنت عايزاك فيه ..

سعاد : خير شوقتيني … هنعمل عصابة فيفي و سوسو … ههههه

فاديه : من ناحية خير هو خير …. إنتي عارفه أن وليد كسيب و على قلبه ملايين كتير ، و صحته حلوه … ههههه … و نفسه كمان حلوه … ههههه …. و اللي بتطلع في دماغه بيعملها ولا بيهمه حاجه ..

سعاد : أيوه و بعدين و أنا مالي بكل ده ..

فاديه : لأ يا حلوه دا مالك و مالك و نص … هو احنا مش طول عمرنا أصحاب و سرنا مع بعض .

سعاد : طبعا يا حبيبتي

فاديه : يعني ممكن تغدري بيا ..!!؟

سعاد : عيب عليك يا فيفي برقبتي يا قلبي … هو فيه أيه ..؟؟

فاديه : فيه قانون جديد بيقول إن اللي يتجوز على مراته من غير علمها بيدفع غرامه كبيره مش عارفه كام ألف جنيه … و يتسجن كمان ..!!

سعاد : أنا مش متابعه …. الله يسد نفسك … يعني كدا الرجاله هتخاف تتجوز و أنا هقعد كدا زي البيت الوقف …!!

فاديه : لأ يا فالحه …. دا انا رسمت لك خطه ما تخرش الميه .. افك بيها عقدة سوسو حبيبتي و نطلع منها بكام ميت ألف يطمنونا في الزمن الاغبر ده ..

سعاد : إزاي يا أروبه من يومك يا مرضعة إبليس …!!

فاديه : انتي دلوعه و حلوه و ما فيش راجل بياخد في ئيدك غلوه ..

سعاد : كوبه يا فيفي … على ايه يا حسره … أهو قرك دا اللي جابني ورا .

فاديه : اصبري عليا بس و أنا هاجيبك قدام و اقعدك و ادلعك ..

سعاد : قولي … كملي … يا حظي ..!!

فاديه : انتي عارفه جوزي كيفه في الدنيا الستات و هرموناته بتنقح عليه و صحته مساعداه …. و الأهم بقى جيبه عمران …

سعاد : هاااا …. نشفتي ريقي … و أنا أيش أخششني في هرمونات وليدك …. إنتي بتحنسيني يا ست انتي ..!!

فاديه : لأ … هي دي بقى الخطه … هاظبط معاك تزوريني كام مره و هو في البيت … و تتشيكي و تتغندري و تتدلعي …. و أنا هاعمل من بنها …

سعاد : يا نهارك ما لوش ملامح … و افرضي يا فيفي عجبته و هرموناته قالت له انا عايزه من ده يا حوزومبل … ههههه

فاديه : و هو دا المطلوب يا سوسو … انتي بس شوفي شغلك بحرفنه … و أنا من ناحيتي هاعمل فيها عيانه و زهقانه و مكتئبه و اجوعهولك و اللوعهولك و اخليه مشتهي كلبه تبص له ….

سعاد : إخص عليك … يعني انا كلبه يا يا خاينه …

فاديه : ( مداعبة ) انتي دانتي قاااامر ….

سعاد : حلوه اللعبه دي أحسن من الزهق إللي أنا فيه … ها و بعدين …

فاديه : ولا قبلين … انا أعكر الأناني …. و انتي ترمي شباكك للصيد …. و هو يقع زي الجدع و يتهبل عليك … و انتي تدعي العفه …. و هههئ … بالحلال يا لولو …. دلعيه …. دلعي وليد … عادي هو بيحب لولو … ههههه

سعاد : طيب و انتي استفادتي أيه …. بتخدميني يعني …. هههه

فاديه : أخدمك في خرجتك إن شاله … انتي اتهبلتي …. دا احنا دافتينه سوا ..

سعاد : طيب رسيني ع الدور طااااه ..

فاديه : انتي هتشترطي عليه جواز شرعي بمأزون … لكن في السر … عشان انا صاحبتك و تخافي على مشاعري و كدا يعني …

سعاد : ماشي و بعدين

فاديه : خلاص يا ناصحه … هو اسبوع وللا اتنين اسيبهولك تتدلعي و تتمتعي ( بغيظ ) مانتي صاحبتي بردوا و عارفاك طفسه …

سعاد : و بعدين هتقتليني وللا أيه …!!

فاديه : اقتلك ازاي بس دا احنا شركا … واخده بالك من شركا دي …

سعاد : طبعا ( ضحكه رقيقه ) شركا في وليد …

فاديا : لأ يا حلوه … شركا في كل حاجه … دا شغل … النص بالنص … في الدهب اللي هيشبكك بيه و المهر و المأخر اللي هتاخديه لما تطلقي بعون الله ….. دا بقى غير مكافئة نهاية الخطه ….

سعاد : هو لسا فيه نهاية الخطه …!!

فاديه : شكلك خايبه و هتضيعينا ..

سعاد : أنا باسأل بس … هو حرام اسأل …!!

فاديه : بعد اسبوع العسل … هاطب عليكم زي القضا المستعجل … هترتبكي و تجيبي لي قسيمة الجواز … و اهدده بالقانون و إني هابلغ عنه و اسجنه .

سعاد : هتسجنيني يا فيفي …!!

فاديه : يا رب صبرني … ما فيش حد هيتسجن … هو الفلوس معاه كتير و هيخاف على سمعته في السوق و بدل ما المحكمه هتحكم ب ١٠٠ و سجن … تساعدي معايا في الكلام و تهديني و نتفاهم على ٢٠٠ ألف من غير قضايا ولا حاجه ..

سعاد : و تاخدي الفلوس و تسكتي ….

فاديه : يا حلاوتك … انتي هتنسي نفسك و تعيشي الدور … دانتي عارفاني مجنونه … دا انا اقتلك و اقتله و اقتل نفسي … هتقرطسيني يا و نصيبي من صحابي ..!!

سعاد : بهزر يا رمضااان … ما هزرش … انتي قفشتي كدا ليه … و بعدين ..

فاديه : هاشترط في الاتفاق إنه يطلقك … و انتي هتبكي و تنعي همك و تندبي حظك

سعاد : و الطم …. و اطلع من المولد بلا حمص .

فاديه : إهدي يا منار …. دا رسم … و انتي تصعبي عليا و اقول له يديك المأخر و النفقة و كل حقوقك …. و خليك فاكره …. بالنص …. كله بالنص ..

سعاد : دانتي تربية مافيا …. هو فيه كدا …

فاديه : ربنا يخلي لنا اللي بيعملوا القوانين .. و اللي بيعملوا المسلسلات … هههه

و ينطلقا ضاحكتين و يذهب إبليس إلى الشرفة ليلقي بنفسه مستريحا من غبائه ..