الأربعاء , سبتمبر 23 2020

حبيبتي يا أرض الفانكوش……قصيده للشاعر أيمن الدسوقي

حبيبتي يا أرض الفانكوش
يا أُم الأمل : نَظرة
الوِش لِسه برضه بَشوش
مِ الوَجع ,
حُضن الحبيب هو السُترة
و إن كان في يوم حُضنك مَغشوش
تِلقىَّ الحبيب نَفسُه صَخرة

حَبيبتي يا عاوجة الطربوش
على العينين حجب الرؤية 
حبيبتي , و دقدق يا شاكوش
إعمِللنا كُرسي فِ قهوة
و عُمر باصِص مِ الشِباك
و عُمر عدى على سهوة

حبيبتي يا بلد المهاويس 
الكُل عايش ,
بَس فطيس 
بِ حبة زرقا أو عرانيس 
هي حورية و هو عريس
تنام لابِس
تُصبح ملبوس

حبيبتي ,
و فاردة الأحلام 
مد البصر في عيون ما تنام
حبيبتي يا أوهام
زي الدراعات مفتولة 
كلام 
زي القلوب بتدق
كلام 
زي الأفعال 
و الفعل كلام

حبيبتي يا الباب العالي
لا مرة رُحت 
و لا مرة جالي 
إحنا كتير 
بس القليل منك عاجبك
و متعاجب
و لا همه مره تِرحالي

حبيبتي يا نَدهِة مَدنة 
فيكِ الفلاح طلع المادنة
و ساب الأرض تِتشقَق
و ساب الأرض تِبعدنا 
و ساب 
الآهة تِتمدِد
و تِتعدِد و تبقى فينا زوادنا

حبيبتي و الصباح فرض
و ضحكة ولادك فرض 
مين اللي قال الرضا فرض ؟
مين اللي قال النعيم في آمين
و إن الهلاك في الرفض ؟!

حبيبتي
و نفسي أحبك و أنا فايق 
نفسي أحبك
و اكون انا لايق
و لا موش لايق
نفسي أحبك و اتعايق
ما انيش مكسور 
و لا مَجبور
و لا راضي و مِتضايق

حبيبتي 
مدي ايديك للحكمة 
و الحكمة موش عواجيز
و لا براويز
الحكمة ناطقةفي اللمة 
الحكمة نورها موش مغشوش
الحكمة نورها مِ العتمة 
الحكمة كل الحكمة 
في الرحمة !!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: