خايف .. شعر : رامي هشام

#قصيدة_جديدة ✨ 📝

#خايف 🇪🇬

بيقولوا المَيَّة مسيرها تقل
عشان السد
بيقولوا كمان لجل ما نبني
مستقبل بنتي أو إبني
نستحمل قرن كمان في الهَد

بيقولوا ده فيه خطة تطوير
و فيه ١٠٠ إنجاز و بشكل كبير
بس البلوة إن إحنا كتير
و الحل حزام ع الوسط يشِد

بيقولوا الغلا زايد و الكوا
مش راحم حد و كله استوى
حتى فيه فيروس طاير في الهوا
و الوضع ده بقا زايد ع الحَد

بيقولوا في أخبار متسربة
عن سبوبة .. آثار متهربة
و كلام عن فواتير الكهربا
فيها الأرقام ما تسرش حَد

بيقولوا كلام بس على خفيف
مسمعتش منه غير تخاطيف
بيقولوا سجارة باين و رغيف
يمكن تخاريف او جايز هبد

بيقولوا القلم اتهرى م البَري
و الچنط إتحنى من كتر الجري
بيقولوا كمان ممنوع الهَري
و الإشاعات دي نوَقَّفها لابُد

بيقولوا و يحكوا عن البنزين
و عن الصحة و عن التأمين
و عن العلمين و عن التموين
و انا مش فاهم و في شعري بَشِد

بيقولوا هاسيندا و مراسي
و جرايم قتل و مهرجانات
بيقولوا في عالم بتقاسي
و في عالم عايمة على الدولارات
بيقولوا و يعقدوا ف مقارنات
و كتير أوي أوي م المتناقضات
خلت نفسي يا عالم تتسد

بيقولوا كلام ف كلام ف كلام
معرفش ده صح ده أو أوهام
و بسببه بقيت مش عارف انام
و الموضوع كده لأ فاق الحد

و الله ما ليا انا ف سياسة
ولا تنظير و لا شغل غلاسة
و لا عايز أتمصمص و أتواسى
انا عايز أفهم و خلاص هتسَد

و ادي حلفان تاني للساسة
و النعمة ما بفهم في سياسة
مشكلتي دماغي المتعاصة
بكلام معرفش هزار أو جد

بيقولوا بلاوي في بلاوي
و أكيد للنكد أنا مش هاوي
هواياتي يا كورة يا غناوي
مش حد بتاع أعصاب تتشد

وسط الشبورة دي مش شايف
و على السبورة انا مش عارف
أكتب.. و بقيت فعلا “خايف”
و ده إحساسي دلوقتي بجد.

#رامي_هشام ٤ أغسطس ٢٠٢١

عن shabana shabana22

شاهد أيضاً

دقّةُ التّعبيرِ القرآني (التّرابطُ بينَ الآيات) …..بقلم خليل الدّولة

قالَ تعالى (إنّ الّذينَ آمنوا والّذينَ هاجروا وجاهدوا في سبيلِ الّلهِ أولئكَ يرجونَ رحمتَ الّلهِ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: