السبت , نوفمبر 28 2020

خدلك ساتر من اوجاعك ….قصيده للشاعره نهى سعيد

خدلك ساتر من اوجاعك
واعلن الحرب علي الروتين المميت ..
وافتكر كام حد باعك
تحت شماعة الظروف ..
تتر الحياه اصلا عبيط

صفي ذهنك م الشرود ..
واضغط زناد الحب يقتل اي خوف
اياك في يوم تستسلم لاوجاعك
لون خُطاك بالوردي جداً واستميت ..
والبس خوذه من البرود ..

احيي اشجار الهوا جوه القلوب
خليه يزهر ..
الدنيا اخر مشهد في الروايه ..
ومفيش حياه من غير ذنوب
استغفر ..
وابدأ من جديد

افرد شراع الشوق
واركب مع نوح في السفينه
الحياه فعلا لعينه ..
ازهدها وطبطب علي روحك
لجل ما تبحر في ملكوتك ..
غني لليل / للقمر
سمّع خطاك للي تحت يمكن في يوم يطمنوا ..
واصبر الصبر الجميل ..
اقطف عيون من ع الشجر ..

الدنيا متسابه / سيبها قبل ما تسيبك
خليك حويط …
الربيع فصل واحد في السنه
إخرس جميع الألسنة
وابتهل لله ..
الحياه مفيهاش حياه !!

اعمل عبيط لو يوم اتوجعت ..
اعرب الجمله واكتبها تاني من الشمال لليمين
قول للغبي ايوه اقتنعت

الدنيا بحر هتغرق فيها بس لو حاولت تعوم
سيب روحك تحدفها الامواج ..
هتكرر الهاشتاج
وهتلقط الصوره وتبتسم ..
وتفرد جناح حلمك المكسور
وتنط سور الفبركه ..
اتعجز علي روحك وعصايتك العاج ..
جسمك يا حول الله ميان بثور
سدها بكفك ..

هتغمز للبنات الحور
هتحبك ..
اياك تلوث الجنه بأفعال البني ادمين
الناس هتدعي / وانت دايما قول امين

سد ودنك عن الحق عشان تعيش زيهم
حبة ( بشر )
المعني مجازاً للشاعر ..

بلاش تعيش زي البشر ولو طريق الحق واعر ..
في الدنيا الظالم والفاجر
كلها القاب / متدققشي
بكبيره يومين عايش فيها وبعدين تمشى

الخمره مبتسكرش غير اللي عاوز يسكر
الحب بيسكر
بيقوي …

وطي وانت بتعدي من الممر ..
وخد في ايدك حد بتحبه
الوحده داء ..
افرح وانت بتسيبها ( متخافشي )

واحفظ لك كلمتين علشان تنجح في الامتحان

هما البشر دايما كده كُتلة غباء

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: